theme-sticky-logo-alt
theme-logo-alt

Pynman ka Seiñraij Jowai ya ka Chaad Sukra wa phooh wa phieñ

Ka Chaad Sukra 2022 ka Seiñraij Jowai da pynkut ya ka kawa da sdang ha ka 23 tarik da ka yalehke Drama kawa da e pyrtuid ‘Dukha’ heiwa ynne da pynman yei Mih Yaw deiwa sdang na Madan Myngkoi Pyrdi, cha Biar Ka Blai wa cha Iawmusiang wei dapynkut da ki Chaad Kpær Syntu Pyllah wa ki rwai heipor miet ha Madan Myngkoi Pyrdi hi kawa tip kam ka Miet Pynwiar Ngiah.

Ynne i step ka sngi Musiang kawa man ka sngi mih yaw da pynman ya ka lehkmen ha Madan Myngkoi Pyrdi wa da wan sakhi da u Kyrmen Shylla, Montri sorkar kam u kongsan deiwa emlang leh u MLA ka Jowai, u Wailadmiki Shylla, u Dolloi ka Elaka Jowai, u Puramon Kynjing, u Dolloi ka Elaka Shangpung, u Chanki Langbang, u Dolloi ka Elaka Nangbah, u RM Garod, ki heh ka Seiñraij Jowai deialang wa ki paidbah wa boon.

Ha kani ka sngi leh neiliang u Dolloi ka Jowai da pynlait u leh ya ka kot Ñiamtre kawa da chon biang hei sien wa ar namo ka 2nd Edition hadien wa pynmih nyngkong ha u snem 1991 daka Khynroo Khyllood Committee ka Seiñraij (KKC) heiwa da pynheh, da booh thymme, da pynbait, pynbha chooh chooh ya kani ka kot.

Neiliang u Kyrmen Shylla hawa e yei klam da ong u wa katwon sñiawsuk u yoo yei riam tynre wei du na ini leh ye ko wow khriñ ya kiwa uiñke suwari deiwa ong leh wa hanla oo katni da man skur u tangwa ym jooh em mylliñ u ya i pynmyllieñ wa da pynjooh da u warim.

Neiliang won u Wailad Shylla da ong u wa emkaam u mih wow yoh ya ki bru yow pynim wei wow pynneh pynsah ya ka riti dustur deiwa kitbok kitrwiang wow neh ko waroh chi junom.

Da ong u leh wa ka Chaad Sukra katni toh kawa yoosuk bha wei ym toh ka chaad wa pyndep rukom donhi chisien chisnem, tangwa dei e ngooh e dem leh yow Tre Ki Rot, ha deilang i kyrkhu kyrdoh chwa u hiar rep hiar riang.

Kamwa yah ki warim, ka Chaad Sukra wan ko deilang wa i chaad i kmen, i rwai i siaw tangwa katni diaw i mynsien u wa boon ki thaw ha ri loom Jaiñtia wym em de ka put ka tem. Kamtæ kyntu u yaka Seiñraij Jowai kamwa da man ko kawa yahluti ya chiboon ki kaam wow yah luti haroh ko wow pynim biang yei put i tem.

Hadien wa pyndep ya ki rwai ki chaad na Madan Myngkoi Pyrdi da mih yow lai cha ka Biar ka Blai neitæ won sa cha Iawmusiang heiwa heini da wan wow sakhi da u Chief Justice ka Meghalaya High Court, u Sanjib Banerjee kam u kongsan.

U Chief Justice hei klam yong oo da ong u wa emkaam wow burom wei wow pynim wei wow pynneh pynsah ya ka dustur riti yong i, wei i biang ka puræ puthi, i stat sayan, ka roi ka paar toh u man pathan u ksoh chynnam i ya ka dustur riti, kamtæ da e khublei wei sñiawkmen u wow yoo yei sur, i riam wa i boon paaid wa da wan wow chimbynta.

Kamtæ da pynkynmoo u wa emkaam wow burom ya ka rymaw, nadooh ki um ki wah wa waroh kiwa im hapoh yong ka. Neibhah i toh kiwa pait wa chare neibynta ki juk wow wan yow ye ki u yoh yei kyrkhu.

Da ong u leh wa oo da man sakhiat u uwa da kyrkhu wow yoh u em hapoh kani ka jylla kawa em sakhiat yei spah deiwa ong u wa kut wa lai luti da yap biej u pait yei miat wa em soodong.  

Kiwa da chimbynta ha kani ka sngi najrong ki dong wa em ha Jowai, da wan leh ka Sein Tylli Lang Niamtre, Seiñraij Ummulong, Seiñraij Shillong wa ka Shlem Ki Sur Tynre Shangpung. 

Share this:
Previous

Yoh takma ksiar u Hame Shaniah Suiam ha ka All India Inter University Kickboxing Men’s Tournament Championship

Next

Da pynlait ya ka kot “Tynre-Back to my roots” wa thoh da u Daohi Manar