Jowai: Kam chibynta wow pynsñiawthooh paidbah chaphang u khniang HIV wa i kjut AIDS, ka Society for Urban and Rural Empowerment (SURE) deiwa kyrchaan poisa ka Meghalaya AIDS Control Society (MACS) da pynman ko ya ka yakop rwai trynre heiwa ki rwai toh u klam ki chaphang HIV/AIDS.
U S.C. Laloo, ADC West Jaiñtia Hills uwa wan wai ya kani ka yakop da ong u wa emkaam u rah ya ka khubor chaphang u HIV/AIDS cha kylleiñ ki chnong neibhah katni du ha Jowai katkam wa yoh yukheiñ da em hadooh 360 kiwa em HIV.
Da ong u leh wa duna wa bien u wan cha khmat kiwa em HIV neidaw wa tieñ ki ya chah kyntait ki ha ka imlang sahlang kamjooh hadooh ka niam leh sarom ki u klam chaphang ini waroh kamtæ kam kani ka yakop pynchlur ko wow yaklam chaphang ini waroh.
Ha kani ka yakop da wan bichaar u Kamai War, Raymond Nartiang wa u Shiborlang Nongjngi heiwa kiwa chimbynta da em ki 6 tylli ki dhab kiwa wan nadooh na Sabah Muswang, Wapung, Namdong wa na Jowai.
Ha wa kut da jied ya ka dhab wa tip kam ka Diio Augusteen Group na Khimusniang kam kiwa jop kiwa da yoh leh ya ka song poisa wa T. 12,000, hei wa ar da poi ki Challam Brothers na Panaliar kiwa da yoh ya ka song poisa wa T. 8,000 katwa yei naam wa le da yoh ki Gracious Disciples kiwa na Wapung Skur kiwa da yoh leh ya ka song poisa wa T. 6,000.
Discussion about this post