Ka yung krehkaam ka Society for Urban & Rural Empowerment (SURE), Jowai deiwa ya krehlang waka Nehru Yuva Kendra Sangathan Jowai da pynman ki ya ka yalang National Youth Convention ha ka 10 tarik uni u bnai.
Ha ka yalang wai pynemburom kawa da man ha yung skur ka H.K. Singh Memorial Secondary School Jowai da em u Waheh Chnong yong ka Iawmusiang Tympang u E.S. Shylla kam u kongsan ryngkat u Rev. Dr. H.H. Mohrmen, Secretary ka Society for Urban & Rural Empowerment (SURE), ki wakreh ka SURE wa kiwi de.
Hawa e yei klam, u Shylla da ong u wa phang wa da yaklam ha kani ka sngi man ko kawa emkaam bha neibynta uwi pa uwi khamtam ki khynroo khyllood kiwa emlang ha kani ka sngi. Da yaroh u ya ki kaam wa kreh ka SURE yow kyntu ya ka imlang sahlang khamtam cha ki thaw wa em cha palatsor. Da kyntu u leh ya ki khynroo khyllood wow man kiwa em yei kitkhlieh ya ki kaamram wa ya kiwon kiwon ki kaam wa da pynkhamkti ha ki.
Ha kani ka sngi da yoh yei batai hajrong soo tylli ki phang kitæ ka Soft Skill kawa da e da u Rev. Dr. H.H. Mohrmen. Ha kani ka yaklam da kynthup ya ki phang kam ka Effective Communication, Empathy, Critical Thinking kawa emyatoh wa i rukom chim rai namo ka Decision Making wa ki rukom yahkhmat namo ka Leadership Style kiwa boon.
Kawa ar toh chaphang i chong kurim dang khynnah wa e da ka Niwankan Shylla, kawa le toh chaphang i drugs wa ki jait dih wa boon jait iwa da e da ka Dakapaia Bareh wei kawa soo toh chaphang ka AIDS wa da e da ka Coriniki Slong kiwa man ki wakreh yong ka SURE.
Palat 50 ngut ki khynnah, ki khynroo, ki khyllood yong ki chnong waphær waphær na ka West Jaiñtia da wan ki wow ya chimbynta ha kani ka yalang kiwa da pynsñiaw yei myntoi chiboon na kani ka yalang.
Ka Felicia Liam na ka chnong Demthring, West Jañtia da ong ko, “I chongkha khynnah namo i yoh kurim khlem da da tohi por da roi bha cha ki thaaiñ nongkyndong kamjooh leh i dih muaid kamtæ kani ka yalang da e yumut ko hadooh kattæ kattæ ya nga.”
U Wikidaroilangki Lamare wa na Mynthong, Jowai da ong u, “Ki phang waroh kiwa da yaklam ha kani ka sngi toh kiwa emkaam, heiwa i klam hajrong ka Communication Skill man ko kawa emkaam bha wei kawa e yumut ya ki khynroo khyllood hei im yong ki wa man-ka-sngi.”
Ka Delphi Mystica Bareh kawa na Nongtalang da ong ko wa da yoh myntoi bha na kani ka yalang wei iwa rap kongsan toh wow chaniah hei bor yong idæ wei waroh toh iwa da sdang na yung.
Ya kani ka yalang da pynman deiwa bood ryntih ya ki kyndon yada na ka khlam COVID-19.
