Ka Society for Urban and Rural Empowerment (SURE) ynne ka sngi da pynman ko yaka yaw ya dai ya thied symbe tynre kawa tip kam ka Community Seed Fair ha Ladthadlaboh Indoor Hall Jowai, kawa da wan chimbynta da ki warep naki chnong waphær waphær.
Dang ini wa dep ka SURE da dep pynman ko yaka e kylliang yaki symbe (Seed Exchange Programme) ha Jowai hapyrdi ki warep naki Block waphær waphær neibhah wa em ki jait symbe wa em ha Block Amlarem tangwa ym em won ki ha Block Laskeiñ, Thadlaskeiñ wa kiwi. Katwa ynne ka sngi won da pynman dei rukom ya dai ya thied yaki symbe wei ki warep leh da chimbynta ki wow ya thied yaki jait symbe wym em haki thaw yong ki.
Hei yaklam wa u H.H. Mohrmen, President SURE waka Coriniki Slong, da khana ki wa heiyatoh wa ini i bynta u pynneh pynsah yaki symbe tynre, da yakrehlang waka Northeast Slow Food & Agro Biodiversity Society (NESFAS).
Pyntip ki leh wa em ka thaw pynlang symbe tynre ne (Community Seed Bank) ha chnong Moolum, heiwa ka kynhun ki warep da pynlang ki chi thaw don yaki symbe, neitæ won em wot leh ki warep kiwa pynlang du samen donhi kiwa ye u pynmih hadooh 25 jait ki symbe wei da wanrah ki cha kani ka yaw ya dai ya thied.
“I daw wa i kwah i wow pynneh yaki symbe tynre toh wa boon da sdang dooh jait ki, wei kamjooh ha kani ka juk i kylla ka suiñbneiñ, ki symbe tynre rap ye ki u chah yei long i man suiñbnein bar ya kiwa wanrah na kiwi won ki thaw,” ong u H.H. Mohrmen.
Ki bru chemphang wada e yei klam ha kani ka sngi toh ka R. Lamare, Scientific Agriculture Officer, R.K. Blah, Horticulture Department, ka K. Lyngdoh, KVK wa u S. Lyngdoh, DPM Basin.
Ha kani ka jooh ka sngi ka SURE da wai paidbah haroh ko yaka Website yong ka kawa tip kam ka www.surejaiñtiahills.org heiwa da wai yaka da u P.K. Bora, ADC West Jaiñtia Hills.
Da ong wa lyngba kani ka Website da khana lut ko yaki kaam waphær waphær waka SURE da leh ko, heiwa ki bru ye ki u pait bniah wei lada em iwon iwon i bynta wa sñiaw emkaam, ye ko wow pynsuk ya ki kamjooh.
