Ka Society for Urban and Rural Empowerment (SURE) deiwa ya krehlang wei deiwa kyrchaan ka yung krehkaam ka District Social Welfare Officer West Jañtia Hills, da pynman ki ya ka yalang ynne ka sngi ha Nongtalang College yow e sikai yow yait na ki jait dih pynmuaid iwa da roi bha ha ka West Jaiñtia Hills District.
Ya kani ka yalang wa pynlai da u Firstborn Myrchiang uwa man leh u Head of Department ka EVS Department yong kani ka College, da yoh yei klam na u Secretary yong ka SURE u H.H. Mohrmen uwa da pyntip wa ka West Jaiñtia Hills da man ko kam kawi na ki District hapoh ka ri waroh kawi kawa da chahktah bha hei dih Drugs heiwa da jied ya ka wow pynman ya ka Nasha Mukth Campaign.
Da ong u leh wa i maa wa ar wa bood ryngkhi nei chah khoom chah kdoh hei dih Drugs toh i ku ki bru kiwa yoh ya u khñiang HIV iwa da mih nei pynemkaam ya ki thyrnia hawa dih Drugs lane neiwa chongkha kulmar khlem iwon iwon i yada khamtam ha i por wa ki bru muaid ki.
Ya i e sikai ya ki khynroo khyllood kani ka thaw puræ hajrong i maa nei dih ya ki kynja jait dih pynmuaid wa kynthup ya i kiad, da e da ka Dakapaïa Bareh ka wakreh ka SURE. Kawa man leh ka bru wa da tip bha wei kawa da kreh leh wa ki bru kiwa da ngat ha i dih wa boon jait khamtam ya i Drugs.
Hadien i pynche yong ka, da yoh leh yei ya kylli na ki khynroo khyllood wa kiwa sikai kiwa da emlang ha kani ka sngi.
Ya ki kyntien pynkut wa ki kyntien e khublei da e da u Ajay Kumar Adhikari uwa man u Head of Department yong ka Political Science ha kani ka College.
