Ka yung krehkam yong ka District Swachh Bharat Mission (Gramin) East Jaiñtia Hills District Khliehriat dei ya krehlang wa ka yung krehkaam u DM&HO Khliehriat waka yung krehkaam yong ka ICDS Social Welfare East Jaiñtia Hills District ha ka 15 tarik yong uni u bnai da lehkmen ki ya ka Global Handwashing Day ha Jalaphet Bri Sumer kawa haap hapoh ka Saipung C&RD Block wa ha Moowakhu yong ka Khliehriat C&RD Block East Jaiñtia Hills District kam chibynta wow pynsñiawthooh paidbah hajrong i emkaam u sait khooid ya ki kti man-i-por deiwa pynemkaam da ka um wa i sabon. I thmu yong kani ki yalang toh wow e sikai wei wow pynsñiawthooh paidbah hajrong i emkaam u sait dei langær yow ye u yada na ki khñiang kjut.
Ha kam kini ki por wa smat i poor ka khlam COVID-19, ini i leh warom yaka Global Handwashing Day pynkynmoo ko leh yei emkaam wow sait kti heiwa ha uni u snem ka phang toh “Hand Hygiene for All” wow ye u yaleh pyrchah ya ka khlam COVID-19, u wanrah ko leh yei chait i khiah deiwa myllien u sait khooid ya ki kti da ka um wa i sabon iwa man iwa emkaam dooh.
Ya ka yalang wa pynman ha Jalaphet Bri Sumer da pynlai ya ka da ka Dr. H. Suting wei kiwa klam ha kani ka sngi kynthup ko ya ka Dr. J. Bamon Medical Officer RBSK kawa da klam hajrong ka phang yong ka National Deworming Week, neiliang u W. Buam District Coordinator Swachh Bharat Mission (G) East Jaiñtia Hills District, Khliehriat da e u yei pynche heiyatoh wa i emkaam wow lehkhooid wow sait khooid ya ki kti khamtam ha kini ki por wa em kani ka khlam deiwa ong wa kawi na ki laad yada yong kani ka khlam toh wow sait khooid ya ki kti deiwa bood ryntih ya ki 7 tylli kiwa hap wow leh hawa sait kti, kiwi won kiwa klam kynthup ki ya ka D. Nongtdu, ka K. Syrti wa kiwi kiwi.
Ha Moowakhu ya ka yalang da pynlai ya ka da ka I. Lyngdoh IEC Consultant SBM(G) East Jaiñtia Hills District wei kiwa klam ha kani ka thaw kynthup ki ya ka Dr. E. Kharmutee District Immunization Officer, ka B. Rynjah, Child Development Project Officer Khliehriat, u K. Kharphuli Asst. District Coordinator SBM(G) East Jaiñtia Hills District, Dr. I.C. Dkhar wa kiwi kiwi de.
Ha kani ka sngi da yoh leh ya i sikai hajrong ki 7 tylli kiwa hap wow leh wow bood manda sait kti kamjooh leh da yoh i batai hajrong iyi mut iwi pa iwi na kini ki 7 tylli kiwa hap wow leh manda sait kti. Kamjooh leh da yoh ya i batai hajrong ka National Deworming Week na ki RBSK Team.
Ha kani ki ar thaw, kiwa klam da pynkynmoo ki ya waroh wa ya ka khlam COVID-19, i pynmyllien wow sait khooid ya ki kti da ka um wa i sabon man ko kawi na ki laad yada wa bha tam. Kiwa klam ha kani ka sngi da kyntu ki ya waroh wow hikai lang ki wei wow pynchlur ki ya kiwi tawon wow bood ryntih ki ya ini iwa da e hikai wow sait kti iwa ye u yada nei kjut, nei poor u khñiang kamjooh kawa e yei chait i khiah.
