Jowai: Hajrong ka thong wow pynsñiawthooh ya kiwa lai puræ yei sih wa mih na ki Plastic wa ktah yaki soodong sookun, ka Thomas Jones Synod College, Jowai, ynne ka sngi da pynman ko yaka yalang pynsñiawthooh hapoh ka College kawa da chimbynta nadooh kiwa lai puræ wa kiwa sikai.
I pynman yaka kani ka pynsysñiawthooh man ko leh kam chibynta ka thong yong ka Swacchta Hi Seva neibynta wow wanrah yaka khooid ka suba haki soodong sookun.
U Dr. R.R. Kharkongor, Principal ka Thomas Jones College da ong u wa da tip wa ka Plastic ka wanrah ko boonjait ki eh neibhah ka ym man ko kawa pyut wei nalor i sih wa khroo yongka wa da jooh yoo lyngba ki Television, kawa pynsahkut yaki nala, da wanrah ko leh yei chlai um, wei ya ini da sakhi leh wot hapoh ka jylla ka yong i.
Kamtæ emkaam wow yaklam hajrong kani ka phang lym kamtæ daw ktah chooh chooh haki pateiñ chakhmat wei lada i dang pynemkaam Plastic i leh tangwa kyrmen u wa daw pynsangeh yaka.
U bru chemphang ha kani ka sngi u Rev. H.H. Mohrmen uwi na u bru wa maya yaka rymaw da batai bniah u deiwa ong, ka Plastic da em ko katni hadooh ki wah, ki duriaw, wei ye u ong hadooh waroh soodong ka pyrthai, kawi kawa maa toh wa ki Plastic psiah ki cha i doh ki mrad wot ha u bru leh ha kiwi won ki rukom wa pynemkaam hi yaki Plastic.
Kamtæ da khot u wow ya krehlang yow pynduna yeiwa pynemkaam Plastic hawa im i.
Discussion about this post