Ka Turf Titans kawa da seiñ da ki chi lok, ynne ka sngi da sdang ko yaka 1st 6-A-Side Football Tournament ha madan Chalton Arena, Mosalyngkat Jowai, heiwa da wan wow wai ya ka da u Moonlight Pariat, Ex-CEM JHADC kam u kongsan, hei emlang u Batskhem Marang kam u symbood kongsan najrong ki bru waheh wasiañ ka chnong Moosalyngkat wa kiwi wa chah khut sñiawbha.
Neiliang u Batskhem Marang hawa klam ong u, i pynman kam kani ka jait yalehke man i wow pynmyntoi ya ki khon khynroo khamtam ha kini ki sngi wa ka imlang sahlang yong i chah tynjooh ko hei kaam sih wa boonjait.
Wei kam kiwa em sap hei lehke Sports kyntu u wow maya ki leh dei thmu wa bha nyngkong chwa ha samen yow lait nei sih, neitæ won u khutlang leh ya ki lok ki jor.
Da e nongmuna haroh u yei jait sih kam i drugs wa lada yoh psiah khlieh i hei thij i pyrkhat da eh wow yait.
Hawa e mynsien ya kiwa lehke ong u lada rem leh wymtoh u sñiawpher neibhah da man hi ki kiwa jop hei im kam kiwa yalehke Sport.
Neiliang u kongsan, u Moonlight Pariat won hawa klam ong u i pynman kam kani ka jait yalehke toh wa pyrkhat kiwa pynlai ya kiwa chimbynta, wei hanla da sdang ya ka nadooh u snem 1930 ha ki ri sepsngi, ha i won kiwa sdang dang ini leh dang biang hi i por wow lai i chakhmat.
Kyntu haroh u ya kiwa yalehke wow chimkhia ki khnang yow yoh u chimbynta ki ha ki kyrdan waphær waphær wot ha ki madan heh kamjooh.
Ha kani ka 1st 6-A-Side Football Tournament da wan chimbynta hadooh kamwa 32 tylli ki liang wei ya ka Final daw pynman ha ka tayaaw wa nyngkong u Naikhynde. Ka song poisa ya kiwa yoh rah naam Champion toh Rs. 70,000 katwa kiwa chah pynrem won Rs. 30,000.
Ynne kawa man ka sngi sdang i yalehke, da pynman ar tylli kitæ toh hapyrdi ka Chai Apps pyrchah ya ka Dakani FC neitæ ka A-Team pyrchah ya ka Re-United.
Discussion about this post