Ka Women’s Welfare Organization Seiñraij Jowai chirup i krehlang waka Assam Don Bosco University dei kyrchan ka UNICEF, ynnin ka sngi da pynman ko yei pynsñiawthooh paidbah hajrong ka phang “Appropriate Behaviour, Routine Immunization and Vaccination” ha Loompyrdi Iongpiah Jowai.
Ka Wa-i-sa Sumer, Adviser ka Women’s Welfare Organization Seiñraij Jowai hawa klam yahkhmat pyntip ko wa kani ka yalang toh u e i pynsñiawthooh wa rap yaar heiyatoh u COVID-19 heiwa ki bru da tyngkhooh ki chiboon i eh i khoo heipor wa sdang wan ban u khñiang khlam, wei da em leh boon ki yung wa da dooh ya kiwa maya saya iwa da wanrah i doohnong i sñiawsih.
Ka Sumki Begum, Project Co-Ordinator, North East Assam Don Bosco University hawa khana yei lai luti kani ka Project, ong ko wa hawa sdang chem chitom ki wow lai luti cha ki paidbah khamtam heiyatoh u pynsñiawthooh ya u khñiang COVID-19 wa i e tika, na ini i daw da jied ki wow ya krehlang waki seiñ waphær kiwa em ha ki chnong ki thaw neibhah wa ki rap jan ki cha ki paidbah.
Najrong wa pynsñiaw haroh ko ya kiwi de ki thong wa chakhmat, kyntu ko leh yaki paidbah wa wan chimbynta ha kani ka sngi u rah wyrta ki cha kiwi tawon yeiwa yoh myntoi ki na kani ka yalang.
Ka Dr. H. Uriah, District Maternal and Child Health Officer, West Jaiñtia Hills District, kam ka bru chemphang yong kani ka sngi ong ko, “Waroh tip i wa i yada rap miat i bar wow dih dawai, tangwa boonsien won ki bru sñiaw saja bha ki u yada, deiwa sñiaw wa suk pathan i dih dawai”.
Da ong ko wa i tika (Vaccine) toh i dawai wow Inject how bru yow pynman yei dooh i pran u bru u ye i u yakhun pyrchah yei kjut. Deiwa pynrap wym mut wa toh iwa pynyap yei kjut, tangwa manda dep pynpsiah næ Inject yei dawai how bru, i doh i pran u bru wow chna dawai yow yakhun yei kjut.
Katwa ka Immunization won ong ko toh i rukom wa krehkaam u Vaccine hei wow chna ya ki chipai hapoh i doh lane i bor u yaleh pyrchah i doh i pran u bru yei won iwon i jait kjut.
Da e haroh ko i batai wa rap bniah heiyatoh ka Routine Immunization namo wow lai e tika tista kawa da sdang nadooh u snem 1978.
Da yoh leh i klam naka Georgina Lamare, Social Behaviour Change Consultant UNICEF.
Chwa ini da yoh i duwai naka Ridaka Lamar, dkhot ka WWO, SRJ i klam naka Sooneta Passah, Secretary WWO, SRJ haka yalang wa pynlai daka Chairperson, ka Hima Lakiang.
