Ki wakreh ka GHADC hapoh i yahkhmat ka NGEA da ong ki wa u yieñ skem ki wow yakhih yow yoh ya ka tulop wa 12 bnai na ki 34 bnai. Deiwa kyrpaad ya u Montri Rangbah u Conrad K. Sangma, yow phah ya u Bendict Marak, CEM wa ka Executive Committee ka GHADC wow leh yeini deiwa su da ka tulop kawa thymme katkam ka Meghalaya Fifth Pay Commission iwa da mynjur ka EC warim ha u snem 2018.
Kam wow pynkynmoo wa ki wakreh ka GHADC da pyrchah ki yei pynbor wow chim ya ka tulop wa 5 bnai da ka EC wa thymme deiwa su da ka tulop warim namo ka Old Scale.
Ka NGEA da beiñ joor ko ya ka sorkar MDA wa ya u Deputy Commissioner ka West Garo Hills uwa da pynkrehkaam da ka Section 144 Cr.PC hapoh u pood u ang ka yung krehkaam ka GHADC deiwa e daw yow wanrah yei suk i saaiñ wei wow yada nei poor u khñiang khlam.
Kamtæ da ong wa ini i pynkrehkaam ya ka Section 144 Cr.PC toh yow pynsuki yei dawa yoh tulop wei lada kwah ka sorkar wow yada nei poor ka khlam, ileh wym su ki ya ka tulop wa da sah palat 34 bnai. Deiwa ong 27-30 ngut ki wakreh daw yap ki neidaw wym yoh tulop ki.
Deiwa rai wym randien, da pynman ya ka yakhih cha sarok heiwa da yoh yei klam na kawi ka manbei kawa da ong wa tieñ ka sorkar du yei yap na u Corona tangwa ym em tieñ ki yei yap ki wakreh nei yap thngan.
Da wan leh wow kyrchaan ya kani ka yakhih da kawi kawa rwai kamjooh ka YouTuber na ri-loom Garo kawa da ong wa ka ri-loom Garo toh u sñiawngooh ki ya ki wakreh ka GHADC kiwa da e yei chakri hanla ym em yoh tulop ki la 34 bnai, kamtæ da khut ko ya ki paidbah wow wan ki chakhmat wow kyrchaan ya ki wakreh ka GHADC neibynta ki jaitbru Garo.
