Ynne ka sngi u khlieh ka liang pyrchah ha ka sorkar, u Dr. Mukul Sangma heiyatoh wa i e tika wow yada na ka khlam COVID-19 da ong u nyngkong emkaam wow pynsñiawthooh ya ki paidbah yei myntoi u chim tika wei wow pynbood won wow pyntikna wa em i dawai e tika.
Da ong u wa hadien wa pynbna wow e tika ya kiwa 18-44 snem i rta da boon kiwa kwah wow chim ya i tika tangwa da phylla ki yei wym em i dawai, da pynrap u deiwa ong wa ini pynyoo i yei tlot ka sorkar jylla wa ka sorkar pyrdi wow pynbiang ya ki dawai.
Chooh chooh da ong u wa ye ki wow pynbaad ya iwi iwi tangwa ki bru wa em ha i bor da toh u ye ki wow pynkhreh ya ki dawai manda yoo ki yei duna ki dawai.
U Dr. Mukul da ong u leh wa kani ka khlam toh yong u khñiang uwa ktah bha ya ki bru wei uwa kylla neipor cheipor (Mutate) kamtæ emkaam wow sñiawthooh kammon wow pynkhreh neibynta i wow wan.
Heijooh i por da ban u wa i e tika toh kawi na ki laad wow yaleh pyrchah ya ka thma pyrchah ya kani ka khlam, tangwa khlem em ki tiar kammon u ye u yaleh wei lada kamtæ kammon u ye u pynkut yei poor kani ka khlam.
