Kiwa chet ja sngi yong ka Mid Day Meal hapoh ka lama yong ka All Jaiñtia Mid Day Meal Worker’s Union, ynne da lai hiar ki cha Shillong yow dawa pynku noh yei nong wa su ka sorkar jylla cha ki.
Katkam wa pyntip kiwa yahkhmat ka Union, i su wa ki kam kiwa chet ja yoh ki toh du T.1000 ha ka chi bnai, heiwa na kani T.900 toh kawa su da ka sorkar bei katwa ka T.100 da su da ka sorkar jylla wei lada kheiñ da man ka nong sngi ki du T. 30 donhi.
Ha kani ka sngi da sakhi wa da ki spah ngut kiwa chet ja Mid Day Meal kiwa wan deiwa lai chong ha ka thaw booh kari wa em hajan ka Additional Secretariat tangwa neidaw wym yoh bor na ki bor pynlai District, da phah noh ya ki wow lai chong hakhmat ka yung krehkaam ka MBoSE yow pynman ya ka yakhih yong ki.
Neiliang u KL Pariat uwa man kam uwa e buit ka Union da ong u, “I dawa i wa ka sorkar bei toh u pynku noh da kammon kamon cha ka T. 4000 katwa ka sorkar jylla wow pynku noh ko cha ka T. 1000 khnang wow yoh noh i su wa T. 5000 chi bnai yow ye u psa wei kyrchaan ya yung ka sem”.
U Pariat da ong u wa i su iwa du T. 1000 chi bnai da booh ko hei eh hadooh kattæ kattæ heiwa kiwa chet ym ye ki wow im wei wow pyndap ya ka yung ka sem.
Da ong u leh wa da dep wow thoh cha u Montri Rangbah ka jylla wa cha u Montri Rangbahdooh ka ri yow pynku noh ya ka nong tangwa hadooh katni ym yoh jubab.
Da ong u wa lada ka sorkar ye ko wow pynlut T. 14 klur wow pynman ya ki tamasa waphær waphær ha ka jylla, da toh u e ko ya katai ka poisa yow su tulop 9 bnai cha kiwa chet Mid Day Meal ha ka jylla.
Chooh chooh da ong u wa kiwa chet ja leh ym jooh yoh tulop ki neibynta u Khonchonglad wa u Kmaichonglad (Nov & Dec) neidaw wym em pynman skur tangwa kiwa sikai skur yoh tulop bait ki.
