Pynmih hukum ka JHADC wow yada ya ka Myntdu wa kiwi ki wah ha ri Jaiñtia

Jowai: Ka Executive Committee ka JHADC da pynbna ko wa katkam ka hukum wa pynmih ka NGT ha ka 27.02.17 da chim wow pynmih ya kini ki kyndon ha wah yow yada ym du ya ka Wah Myntdu kamjooh leh waroh ki wah hapoh ri-loom Jaiñtia.

1. Da khang wym hoi de u noh jhep kat cha wa yoh kam ki plastic song baam, ki klong umsoh, tin umsoh cha ki dooid ki nala kamjooh ha ki thaw paidbah. Kiwa chong chnong haap yabhah ki ya ki jhep ha ki ar bynta kiwa pyut kam ki baam, ki soh, ki jhoor wa kiwi, wei ha kawi tawon toh ki wym pyut kam ki klong, ki plastic, ki battery wa kiwi kiwi.
2. Haap chna Septic Tank ha waroh ki paikhana ki wym pu em Septic Tank. Ki Septic Tank toh u chna da kiwa em Filter.
3. Da khang pyrchah leh wow chna yung chna sem hapoh 500 meter na rood ka Wah Myntdu kamjooh leh harood kiwi ki wah wa em hapoh ri-loom Jaiñtia hanlada ki tre thaw em Land Holding ki wa Patta.
4. Da khang ya ki tre hali kiwa em harood wah wow pynemkaam ki dawai ki wa ye u ktah ya ki wah.
5. Da khang leh wa ymhoi de u tih moo, sai chyiap naka wah Myntu wei kamjooh leh na waroh ki wah hapoh ri Jaiñtia.
6. Da khang ya ki Waheh Chnong wow e NOC u chna yung ha rood ka wah Myntdu kamjooh leh kiwi ki wah hapoh ri Jaiñta kiwa em hapoh 500 meter na rood ki wah.
7. Da khang leh wow thang khloo ha waroh ki thaw wa em ha ri-Jaiñtia.
8. Da khang leh ya kiwa chong chnong ka Jowai kamjooh kiwa wan yaaw wan hat wym hoi u noh jhep ki kat cha wa yoh ki wei kamjooh leh kiwa dai soh dai jhoor wym hoi u noh ki ya ki mar yong ki cha rood sarok cha nala wei toh u noh ki ha ki thaw wa da booh. Da khang leh ya kiwa lum yaaw wym hoi u thang ki yei jhep wei toh u pyllang hei thaw wa da booh yow kit cha i thaw noh jhep.
9. Ha ki thaw wa chariñ kiwa ka umslap noh ko cha ki wah kiwa tip leh kam ki Catchment Areas, ym chah u pam dieñ ha ki, u tih mo, tih chyiap, tih kyndaw lada em ki 100 meter narood ka Wah Myntdu kamjooh waroh ki wah. Lada toh ka wah dooid emkaam u jngai 50 meter.
10. Ym chah de u sait kari sait that ha ka Wah Myntdu kamjooh waroh ki wah wa em ha ri Jaiñtia.
11. Ym chah u chna ya ki skur, Hotel, Hospital wa kiwi kiwi hapoh 200 meter na ka Wah Myntdu.
12. Da phah ya waroh ki thaw sait kari wow booh ki ya ki Filter wa man katkam ka stat sayan wa katni yow man ka um wa tooid cha ka wah Myntdu kawa khooid.
13. Kiwa tyngkhein ya kini ki hukum daw daiñ kuna T. 5,000 ya kiwa noh jhep kiwa pynjæd ya ka rymaw wei T. 25,000 ya ki tu wa thang jhep ha rood sarok wa kamjooh ha ki thaw paidbah.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024