Ka Hynniewtrep Youth Council – East Jaiñtia Hills District (HYC-EJHD) da pynman ko ya ka General Meeting ha Ladrymbai Datsimpein Community Hall, deiwa emlang kiwa kitkaam ka HYC-CEC, neibynta u ya phyllu yumut ya ki kaam wow e chakri ya ki paidbah.
Ha kani ka jooh ka sngi da pynman leh yei pynbaam smai ya ar tylki ki chnat thymme, kitæ toh ka Chiphaw Chnong Circle wa ka Ñiaw Chnong Circle kam chibynta u pynkhlan yei e chakri ka seiñ ha ki thaw waphær waphær.
Da pynsmai ya kini ki dkhot wa thymme da u Roy Kupar Synrem, President Rangbah ka HYC, uwa da ong wa i baamsmai ym man ko du ka rukom krehkaam ka seiñ, man ko leh i kular u kreh, u chakri wei u yieñ neibynta ki paidbah.
Da kyntu u leh ya kiwa kitkaam thymme u man ki kiwa yatylli, kiwa hok hei e chakri wa kiwa smat u yieñ ryngkat wa ki paidbah wa ka jaitbru heipor wa emkaam ki ya ka seiñ.
Ki President yong ki Circle wa thymme, u Aite Sana – President ka Ñiaw Chnong Circle wa u Nangkiew Lamo- President ka Chiphaw Chnong Circle de ki i sñiawngooh ya ka HYC– EJHD wa ya ka HYC- CEC, wei da pynsñiaw ki yei raikut wei kitkhlieh yow krehbha neibynta ki paidbah ha ka thaaiñ yong ki wa ka District hi waroh kawi.
Discussion about this post