Ka sorkar Assam da pynmih hukum thymme ko neibynta waroh kiwa em cha sor wa cha palatsor kiwa daw krehkaam nadooh myntu ka 26 tarik hadooh wa pynbna da kamwi.
Hapoh kani ka hukum da pynkrehkaam ya ka Night Curfew nadooh 11:30 PM hadooh 6:00 AM ha waroh kawi ka jylla lait noh ha ka 31-12-21.
Waroh ki ki jait dukan, ki thaw baam, kiwa dai jhoor dai doh u chah u wai ki hadooh 10:30 i miet.
Ki yalang wa pynman cha lait hap wow bood ya ki kyndon wa pynmih da jar jiar ki District lyngba ki DDMA. Heiyatoh won wa ki thaw wa pynman hapoh ki Auditorium wa kiwi de, daw chah wow em ki bru du 50% neiwa chniam ki bru.
Ha ki thaw niam wa paaw-naam u chah wow em 60 ngut ki bru ha ka chi kynta kiwa da dep yoh tika pura katwa ha kiwi won ki thaw niam u chah du 40 ngut ha ka chi kynta ki bru wa da dep yow tika pura.
Ki Cinema u krehkaam ki deiwa chah u chong ki bru du 50% wei toh u man ki leh kiwa da yoh tika pura deiwa bood ya ki kyndon yada COVID-19.
Heiyatoh wa u Omicron, waroh ki District Magistrate, ki Superintendent of Police wa kiwi ki bor sorkar hap ki wow pynmih ya jar jiar ki kyndon yow kdoh u khoom yei poor u khñiang khlam.
Waroh ki District Magistrate, ki Superintendent of Police toh u pyntikna wa ki bru wa lai cha kitai ki thaw wa da kdaw wow bood ki thij ya ki kyndon yada COVID-19 wei wow booh boon ki bru wow pait yeini.
Ki bru wa tyngkheiñ kyndon daw chah pynchitom ki katkam ka kyndon Section 51 hadooh 60 ka aiñ Disaster Management Act, 2005 deilang waka kyndon Sec.188 ka IPC 188 wa kiwi de ki aiñ.
Ki bru wym deiñ Mask wei kiwa mynthu ha ki thaw paidbah daw chah daiñ kuna ki T. 1000.
Ha Assam hadooh ynnin ka 25 tarik da em ki 757 ngut kiwa dang chah ktah ha u COVID-19 wei da dep wow e tika la 3,69,25,539 sien.
