Hadien wa pynbna u montri rangbahdooh ka ri, u Narendra Modi ynnin wa daw pteiñ ka Lockdown hadooh ka 3 u Naisan, ynne ka sngi ka Ministry of Home Affairs da pynmih hukum ko hajrong i krehkaam kani ka Lockdown.
Ka thong yong kani ka hukum toh wow pynduna yei poor ka khlam u COVID-19 wei wow thooh laad kammon wow yada wei wow yarap ya ki warep, kiwa khih mylla sngi.
Da khang ha waroh kawi ka ri wow hær ki lieñsuiñ, ki ki rel wa ki sarok; da khang ya ki skur wa ki thaw puræ; da khang ya ki karkhana wa ki yaw (Commercial activities); ki yung basiskoop namo Cinema Halls, ki Shopping Complexes, da khang ya i yalang paidbah; ki thaw mane, wa kiwi kiwi ki lympung namo ki yalang wa yatoh wa ki niam.
Da emkaam wow sap ya ki Mask hawa lai kreh næ hawa em ha ki thaw paidbah, wow man kiwa leh khooid, wow pynbiang ya ki Sanitizers, wow leh ya ki Thermal Screening, da khang wow mynthu wei kiwa leh pyrchah wow daiñ kuna ya ki.
Daw khang pyrchah wow leh ya kiwon kiwon ki kaam nadooh ka 20 tarik uni u bnai ha ki thaw wa da jied da ki sorkar jylla, ki bor district katkam ki kyndon ka Ministry of Health & Family Welfare (MoHF&W) khamtam kiwa da chah ktah bha ha uni u khñiang. Ha kini ki thaw ym chah u psiah næ u mih lait na ki kaam wymhoi u sangeh (essential services) kam kiwa yatoh wa i e sumaar (Medical Emergency), ki kaam sonteri (Law & Order Duties) wa ki kaam wa yatoh waka sorkar.
Daw pynjoor i krehkaam ki kyndon ha ki Hotspot District namo ki District wa da chah ktah joor bha ha u COVID-19 wei ha kini ki District da pynmih ya kiwi ki kyndon.
Ki kaam wa daw chah nadooh ka 20 tarik toh wow pyntikna wa ym thut ki kaam rep, ym thut i khih i kreh namo i kamai ki thaw wa man palat sor, u yoh kreh kiwa khih mylla sngi, ki kattu katni ki karkhana daw chah u krehkaam biang ki deiwa bood ya ki Standard Operating Protocols (SOPs). Kam chibynta wow khang yei poor ka khlam da booh ya ki National Directives for COVID-19 heiwa ki District Magistrate ye ki u pynchitom ya kiwa leh pychah ya ki hukum sorkar katkam ki kyndon ka Disaster Management Act, 2005.
Ha ki thaw wa da jied daw chah u kit ya ki tiar wa ki mar rep kam ki kor, ki symbe, ki sboh, ki dawai khñiang, ki dakha, ki mar psan mrad, dud wa kiwi kiwi. Wow kit ya ki mar wow pynkrehkaam ya ki Food Processing Industries; wow chna sarok, ki yulam, ki kreh hapoh ka MNREGA wa kiwi kiwi.
Discussion about this post