Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

Kam chibynta wow lehkmen ya ka sngi kyrpang ki kynthai namo ka International Women’s Day, ka Dorbar Chnong Loompyrdi Iongpiah ynne ka sngi da pynman ko yaka yalang pdiang burom yaka Ridamaya Passah kawa da yoh yei naam 20th Sunsilk Serum Mega Miss Northeast 2024.

U Waheh Chnong, u Bimee Suwer hawa e yei klam wai phang da ong u wa ka Ridamaya man ko kam ka nongmuna ya kiwa boon wow bood ki wei ymtoh wow dooh mynsien ki.

Da khana u ya ka parom yong ka heiwa da sdang ko na ki yakob wa chimbynta dei mynsien wa khian wei dei raikut nei kyrdan wa khian wow yoh u mihkhmat yaka jylla, ka thaaiñ wa ka ri waroh kawi. 

Da khana u ya ki yakob nadooh wa sdang hadooh wa poi ko ha kani ka kyrdan deiwa sdang kamni ha wah:

1. Da chimbynta nyngkong dooh ko ha ka Miss Loompyrdi Iongpiah 2016 heiwa heini man ko kam ka 2nd Runner Up.

2. Chimbynta ko ha ka Miss Hynniewtrep 2017.

3. Dep neitæ yakhun biang ko ya ka Miss Loompyrdi Iongpiah 2017 wei heini man ko kawa jop.

4. Yoh won ko ya ka 1st Runner Up haka Miss Fresh Face Hunt 2017.

5. Jop won ko ya ka Miss Chrysalis 2018.

6. Jop won ko ya ka Tyrchi Queen 2019.

7. Man won ko kam ka Runner Up haka Miss Shillong 2019.

8. Jop won ko ya ka Beauty Queen of Northeast 2021.

9. Man wan ko kam ka Runner Up ha ka Miss Meghalaya 2022.

10.  Da chimbynta ko leh ha ka Sunsilk Mega Miss Northeast 2022.

11. Da jop ko ya ka Winter Queen Shillong 2023.

Da ong u wa na ka tyngkong yong ka dong, sdang ko u chimbyta hadooh wa da jop ko ya ka Sunsilk Serum Mega Miss Northeast 2024 wei da pynkup ya ka kam ka Miss India Top Model of the Universe 2024 iwa man i luti wow sahkynmoo wei neini daw mihkhmat ko ya ka ri India ha ka Top Model of Universe 2024 ka wow yakhun ko ha Turkey ha uni u snem.

Ka manbei R. Passah hawa e yei klam da ong ko wa ka Ridamaya da rah ko yei naam yong ka chnong, ka jylla hi waroh kawi wei man ko kawa smat bha ha ki kaam ka chnong. 

Da e ko leh ki kyntien sneiñ kyntu kamjooh i e mynsien i pynchlur ya ka Ridamaya wow tia ko chaphrang ha kiwon kiwon ki kaam.

Ka Ridamaya da ong ko wa sñiawkmen ko wow yoo wa ka chnong pynkhreh ko kamni wow pdiang ya ka. Da ong ko leh wa lada ha iwon iwon ymtoh u booh da i eh hakhmat wei wow man kiwa tia chaphrang.

Ha kani ka sngi da yoh ya ki kyntien ngooh Blai na u Leki Laloo, wei da pynphooh ya ka yalang da ki rwai na ki manbei wa manpa kamjooh i chaad na ki khon khyllood ka chnong wei da ah leh ya u Cake neibynta kani ka sngi.