Ka yung krehkaam ka chnat PHE-RWS Division Jowai da ye ko wow pynpoi um cha ki 62 tylli ki manyung wa cha 2 tylli ki skur wa em ha Iongthma Nongjngi, West Jaiñtia Hills lyngba ka Scheme Jal Jeevan Mission, ka Scheme ka sorkar pyrdi kamjooh leh kawa da kyrchaan poisa da ka Ministry yong ka Jal Shakti ka sorkar India.
Ka thong kani ka Scheme toh wow pynyoh umkor cha iwi pa iwi i thlu yung hapoh ka ri ha chwa u 2024. Ha Meghalaya da booh thong u pynpoi um ha man ki thlu yung ha chwa u Kamichonglad (Dec) 2022.
Ka chnong Iongthma toh ka chnong wa nyngkong hapoh ka Thadlaskein Block wa da ye u pynyoh um cha iwi pa iwi i yung. Hawa yaklam wa u Junior Engineer ka PHE u J. Suchiang da ong u wa kani ka Scheme da pynsuk bha ko ya ki paidbah khamtam ya ki khynnah kiwa da jooh pynlut por u tong um na ki thlu um wa em cha jngai na ka chnong kawa ktah bha yei por wa ya ka puræ puthi yong ki.
Chooh chooh da ong u leh wa ha kani ka Scheme ka chnong hap ko wow pynlut kamwa 5% kam i sñiaw mantre ya kani ka Scheme um. Ya i pynkrehkaam wei wow sumaar, wow pynneh pynsah ya iwa da yoh daw hap pait da ka chnong hi lyngba ka Village Water & Sanitation Committee.
Ya ini i kreh da sdang ha ini i thaw nadooh ka 11-03-2020 wei da pyndep haka 31-10-2020 hei lut wa T. 29,22,300.