Jowai: Ka parom wow sah kynmoo pateiñ la pateiñ yaka chnong Ummulong, West Jaiñtia Hills District wa ynne ka sngi ka Dorbar Chnong hapoh i yahkhmat u Leo Laloo kam u waheh chnong, da ye ki wow pynsah naam yei sdang ka chnong Ummulong lyngba ki soo kur wa wan na Jowai wa kynthup yaka kur War, Laloo, Kyndiah waka kur Shylla.
Ya u moo sahnaam da chna ha pchem ka Dorbar Hall Ummulong, wei ha kani ka sngi wai da emlang u Sñiawbhalang Dhar u Montri wa pait yaka chnat Transport wa kiwi heijooh i por uwa man leh u MLA ka thaaiñ, neitæ u MLA ka 2-Jowai u Wailadmiki Shylla, u MDC ka thaaiñ u Jesse Suiam wa kiwi.
Katkam ka parom tbian wa khana da u J.M. Kyndiah, ong u wa hawa sdang, kini ki soo kur na Jowai toh kiwa wan sah rep donhi, neitæ kat nanglai ki por ki sngi da yah noh ki wa ki khon ki kurim wei hadooh itæ i por ym pu em pyrtuid kani ka chnong.
Da ong wa neidaw wym ye u sah khlem umbaam umdih, u Long War da tih thlu um u; ha kitu ki por kat wym pu em sarok, ki bru na Jowai hap ki u lai dei kjat cha Shillong neibynta u thied marbaam, wei hawa liwan ki cha Jowai jooh mllien ki u ong baam-ja sngi harood ka thlu um u Long, wei nadooh itæ i por mih i pyrtuid Ummulong.
Kamtæ kat nang lai ki por da wan chong chnong sa kiwi won ki jait kur na ki chnong waphær waphær hapoh ka Ummulong hadooh wa da heh da krai ko kamwa man katni.
U Dolloi ka Elaka Jowai u Puramon Kynjing hei klam yong oo, e u yei sñiawngooh wei kyrkhu kyrdoh yaki soo kur, heijooh i por ong u, “E wa i pynemburom ya kani ka sngi u man ka sngi waka chnong Ummulong sai ko yaki kaambah neibhah wa niar wow em ki chnong wow leh burom ya kiwa wan seiñ chnong”. Kyntu haroh u yaki soo kur kamjooh kiwi won ki jait kur wow em ki i sñiaw yajan.
U Wailadmiki Shylla MLA ka 2-Jowai pynsñiaw u hajrong i emkaam u tip yei tre i thied kamjooh leh ka riti dustur, khamtam ha kini ki sngi wa boon kiwa da myllin neidaw wa pyrchang u bood yei yong kiwi. Da pynrap u wa emkaam hi u yabeh ya ka juk wa katni tangwa wymhoi won u myllin yei yong idæ.
Kyntu haroh u ya ki soo kur wa kamwa ka chnong da booh naam ko yaki, i kamram yong ki toh u em i bahkhlieh hei wow ya ksohktilang wa kiwi won ki jait kur neibynta i bha i miat ka chnong wym wow sñiawthooh bakla næ yahluti bakla dei wow ong wa du ki donhi toh ki tre chnong.
Neiliang u Sñiawbhalang Dhar won ong u, yow ye u pynku ya kawon kawon ka chnong toh dei ya krehlang yong kiwa tawan ki jait kur.
Nalor wa e yaroh u yaka Executive Committee ka chnong kawa da pyrchang wow thooh boon ki laad ki luti yow kyntu kynrong yei bha i miat, kyntu haroh u ya ki paaid wa chong chnong wow mylliñ noh ki ya waroh iwa da dep khnang yow ye u wanrah yei bha i miat haka chnong ka thaw, deiwa ong leh wa i ya sñiaw Politics ym jooh neh ko waroh 5 snem tangwa du chipor donhi.
Heiyatoh won wa ka Memorandum wada e ka Dorbar Chnong ha kani ka sngi, kular u wow pynyoh kamwa T. 6 lak neibynta u chna ka Permanent Podium, T. 2 lak neibynta u chna thaw chet wa T. 2 lak u chna paikhana paidbah. Kini pyn le jait toh yow chna heithaw wa em ka Dorbar Hall.
Heijooh i por pynbna u wa ha u snem wow wan daw pynchna pynmiat lut leh ya waroh ki sarok ha chnong Ummulong.
Chooh chooh ong u wa hanla uni u snem man uwa da chah tynjooh ha kiwa boon ki liang haka imlang sahlang neidaw ka khlam, kamjooh i bor pynjæd pynpra ka rymaw leh, tangwa yooluti u wa u snem 2021 u man u snem wow theh i kyrkhu kyrdoh heiwa u su kylliang u ya waroh i sñiawsih wada maad ha u snem 2020.
Kiwi won wa e i klam kynthup ya u Jesse Suiam MDC ka thaiñ, u Leo Laloo waheh chnong, u A.R. Bathew Pala, ka A. Marboh wa kiwi.
Ha kani ka sngi da wai leh ya u moo pynsah naam ya kiwa krehkaam chnong kiwa da chimkhia u pynsah naam yaki soo kur wa seiñ yaka chnong Ummulong, wei da pynlait leh yei sur yong ka chnong.
Da pyn ka-it chooh chooh ya kani ka sngi dei chaad wada chimbynta da ki soo kur.
