Ka Rot Association of Meghalaya (RAM) da dawa ko wow pynsaja da iwa eh ya u MLA warim ka Mawhati, u Julius Kitbok Dorphang deilang wa ki 3 ngut kiwi kiwa emkti wow slaitbor ya ka khynnah wa 14 snem ha kiwa boon ki thaw ha ki kajiak snem wa nachwa.
“I kyntu i ya ka sorkar jylla wa ka chnat wa toh u pait wow pynngat da ki kyndon wa eh wow pynsaja ya uni u Chairman warim ka HNLC deilang wa kiwi de kiwa emkti wow slaitbor ya ki khynnah,” da ong ka President ka RAM ka I. Kharmuti.
Da ong ko leh wa i slaitbor ya ka khynnah wa 14 snem kawa lui lui toh i kaam ki bru khloo, “Ki kaam thombor ya ki kynthai, khamtam ya i kam ki kynthai wa em ha ini i kaam nang ku ki na ka sngi cha ka sngi, kammon chooh chooh u yai chah i ya ini i kaam yong ki bru kam u Dorphang wei ileh ka Kachari ym pynchitom ko ya kini ki bru kamwa toh”, da ong chooh chooh ka Kharmuti.
Chooh chooh da ong wa ini ym toh iwa thymme heiwa i thombor ya ki kam ki kynthai wa em ha ki kaam dai doh da lai ko da ki phaw phaw snem kattu kat wym pu ka sorkar hi ym tipmit ko da ka aiñ ya i kaam wa kreh ki.
Da kdaw leh wa da em da ki phaw tylli ki mukotduma POCSO pyrchah ya ki bru kiwa emkti wow thombor wei wow slaitbor ya ki khon yong ki, heiwa da pyndam khlem iwon iwon pynchitom næ wot ka takit. Kamtæ da kylli wa ki kam ki kynthai wa em ha ini i kaam ym em hok de ki mo wow ujor cha ki bor ka aiñ kamwa leh kiwi?
Da pyntip leh wa ha kini ki kajiak sngi, ka RAM da booh biang ko sa kawi ka FIR hakhmat u SP, ka East Khasi Hills pyrchah ya uwi u bru uwa da emkti wow slaitbor ya u khon khian (12 snem) ka dkhot warim yong ka RAM, ka M. Snaitang (bam kwai ha dwar u Blai).
Hajrong ini, da pyntip wa ya ka FIR da e nyngkong ha u snem 2018 da ka bei uni u khynnah heipor wa dang im ko, wa da chah slaitbor u khon ko ha ka 21-07-18 ha Khloo Kyntang ha Mawphlang tangwa neidaw wa ki pulit ym Register ki ya ka Case, ka M. Snaitang da hap ko wow mih yaamrem na ka Police Station ha kitu ki por.
Na ini i daw, kam ka seiñ da chim ko ya kani ka luti wow ujor biang sa chisien ya ini i kaam yow pynchitom ya uwa emkti kamwa toh u pynchitom wei wow pynchitom ya u Julius Dorphang wa kiwi de kiwa jooh myllien ha ki kaam salitbor.
Puræ leh: Kem ki pulit ya u Julius Dorphang hadien wa chem ka yung bichaar wa slaitbor u ya ka khynnah
