Hadien wa ka Meghalaya High Court da pynmih hukum ko ha ka 07-09-22 wow khang yei chalan ya u moochuni cha baar ri da kiwa em ya ka Minor Mineral Mining License neidaw wym tip kammon da pynemkaam (End Use) ya u moochuni manda poi cha baar ka ri heiwa kiwa boon da chim kabu ki wow leh yeini deiwa pynemkaam da ka Minor Mineral Mining License.
Neiliang ka sorkar Meghalaya da lai kyrpaad ko hakhmat ka Supreme Court pyrchah yeini heiwa ka Supreme Court da chim ko ya ka rai ha ka 11-11-22 wow pynsangeh ya kani ka hukum ka High Court tangwa ym bien ko wow bichaar ya kani ka mukotduma PIL heiwa da phah ya ka High Court wow pyndep wei wow e hukum wa khaddooh hajrong ini i kaam hapoh 3 bnai.
Uwa ujor yaka PIL da ong u wa ka sorkar da chah ko wow tih moochuni du ha ki kaam wa leh da ki warep khlem da emkaam wow yoh License hei wow tih yei thaw yow rep tangwa da chim kabu yeini heiwa da tih 90,000 MT deiwa kam wow pynkhreh yei thaw rep.
Hei lai luti kani ka mukotduma, neiliang ka yung bichaar da chem ko leh wa kiwa em ya ka License wow tih ya ki Minor Mineral da tih ki ya u moochuni heiwa da chalan ya oo cha baar ri heiwa neiliang ka sorkar da ong ko wa da yoh ko chiboon i nong na ini tangwa ka sorkar won ym ye ko wow pynsakhiat wa kiwa chalan ya u moochuni da pynhun ki ya ki kyndon wa da pynemkaam ya uni u moochuni ha ki toskhana wow chna ya ki mar wa pynemkaam hawa chna yung. Wei kani toh ka kyndon wa da booh da ka Ministry of Mines ka sorkar India heiyatoh wa i pynemkaam ya u moochuni wa da dep tih kam u Minor Mineral.
Ka High Court da ong ko leh wa ka sorkar ym em wa khang ya ka wow bood ya ka aiñ wei wow pyntikna wa kiwa chalan ya u moochuni u em ki ya ka Major Mineral License katkam ka aiñ.
Kamtæ da ong wa kattu u chong pyrkhat ya ka kyndon wa da pynmih da ka Ministry of Mines yow e ya ka hukum wa khaddooh wei daw chong bichaar khaddooh haka 21-11-22.
Neiliang uwa ujor ya ka PIL da ong wa kiwa pyrchang u chalan tooh ya u moochuni da booddien bha ki ya kani ka mukotduma wei da em leh kiwa da pynchlur da ka sorkar wow lai cha ka Supreme Court heiyatoh wa ini i kaam tangwa ym em won wa da pyrchang wow embynta ha kani ka PIL ha High Court.
Puræ leh: Ym ye u chalan ya u moochuni cha baar ri da ka Minor Mineral License: High Court
