Ka Dorbar Chnong Hingaria da pynsñiaw ko yei sñiawngooh wa khroo ya u Montri ka chnat i chait i khiah, u Wailadmiki Shylla yeiwa da pynbait wei pyrkhat u yei eh yong ki paidbah ka chnong Hingaria hawa yatoh wa ka Health Sub-Centre.
Kani ka Sub-Centre toh kawa da yoh mynjur ha u snem mang tangka 2023–2024 hapoh ka Scheme PM-ABHIM (Pradhan Mantri Ayushman Bharat Health Infrastructure Mission) – 2nd Phase, neibynta i myntoi yong ki paidbah ka chnong Hingaria kawa em ha ka thaaiñ khappood wa ka Bangladesh ha East Jaiñtia Hills District. Tangwa ym em sdang i kreh ya ka iwa da pynartatien wei da pynkhuslai ya kiwa chong chnong.
Hadien da booddien yeini deiwa booh RTI ha yung krehkaam u District Medical & Health Officer (DM&HO) da u Andrias Talang heiwa da chem wa em i thmu wow kyrriah noh ya kani ka Sub-Centre na ka chnong Hingaria.
Kamtæ neiliang ka KSU South West Border Circle da lai yachem ko wa u Wailadmiki Shylla yow khana yei eh i khoo wa da maad kiwa chong chnong ka Hingaria heiwa da kular u wow paitbniah yeini.
Hadien ini kamwa da kular, neiliang u Montri da pynskem biang u yei em kani ka Sub-Centre ha chnong Hingaria iwa da pynkmen wei e mynsien ya kiwa chong chnong wow yoh myntoi ki hei kaam sumaar sukhær.
Ka Dorbar Chnong Hingaria da e ko leh yei sñiawngooh ya ka MLA ka thaaiñ, ka Santa Mary Shylla yeiwa da kyrchaan wei booddien ko yeini i kaam.
Da e khublei leh ya waroh kiwa da e yarap nadooh ka KSU South West Border Circle, u Andrias Talang, u Hamewanpynhun Ryngkhlem na ka KSU East Jaiñtia Hills District Unit, u Reachingson Siangshai wa kiwi de kiwa da emlang.
Da kyrmen leh wa ka sorkar Meghalaya daw pynsmat ko yei kreh ya ka Health Sub-Centre khnang wow ye u pyndep heipor wa biang najrong wow pynbiang leh ki sarok, ka puræ puthi, ka bordiñ, ka Mobile Network wa kiwi de kiwa kongsan.
Discussion about this post