Pynsñiaw ka CC ka KHADC wa emkaam wow kynthup ya ka JHADC hajrong ka aiñ chongkha ka KHADC

Shillong: Ka Consultative Committee (CC) wa da chna da ka Executive Committee (EC) ka Khasi Hills Democratic Alliance (KHDA) kawa synchaar hapoh ka Khasi Hills Autonomous District Council (KHADC) ynne ka sngi da chong yalang ko ha ka sien wa nyngkong wow phyllu yumut wei wow bichaar bniah yei duna ka Bill ka KHAD kawa tip kam ka Khasi Social Custom of Lineage (First and Second Amendment) Bill.

Kani ka Committee wa khlieh da u Mansturdy Nongrem, MDC ka Langrin Constituency kam u chongknor da chong pyrkhat ko ynne ka sngi hadien wa ka KHADC da yoh pdiang biang ko ya kini ar tylli ki Amendment Bill wa da pynuiñ da ka sorkar jylla ha ka sngi nyngkong ka tayaw.

“Kani ka Bill wow khang chongkha khleh wa da mynjur da ka dorbar KHADC ha u snem 1997, wei da yoh ya ka muhor wow man aiñ ha u snem 2005, da pynpsiah kyndon chooh chooh ha ka ha u snem 2015 wa 2018, ka Committee ym em yoh ko wow phyllu yumut bha neibhah sñiaw i wa dang emkaam wow pachat yumut chooh na ki lok na ka Jaiñtia Hills katæ ka JHADC.” da ong u Nongrem hawa klam wa kiwa pathai khubor hadien wa kut ka yalang.

Da pynrap deiwa ong “Da chim ya ka rai wa kani ka Committee ymtoh u em ko du hapoh ka KHADC, tangwa emkaam leh wow kynthup ya ki dkhot na ka Jaiñtia Hills Autonomous District Council (JHADC).”

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Chooh chooh da ong u wa ka Committee ympu yoh bha ko wow phyllu hajrong kani ka Bill, tangwa da rai wow thoh cha ka Executive Committee ka KHADC wow khut lang ya ki dkhot na Jaiñtia Hills, neibhah ya ki Khasi da tipmit lang Khasi-Jaiñtia khnang wa ka aiñ u man ko i jooh.

“Ka Committee sñiaw ko wa ymye wow chim rai du da ka KHADC, tangwa emkaam wow emlang ki dkhot ka JHADC neibhah ka Bill emkaam ko wow man neibynta ki Khasi wa Jaiñtia,” da ong u Nongrem.