Shillong: Ka Synjuk ki Nongsynshar Shnong ka Bri Hynñiewyrep (SNSBH) ynne ka sngi da pynsñiaw ko wa ki kyndon næ ki Standard Operating Procedures wa thymme ym man ki kiwa che wei da wanrah ko yei eh ya ka chnong ka thaw wei kamjooh ya kiwa ha yung. Ka Synjuk da dawa ko na ka sorkar wa toh u pynche bha deiwa chim yei e yumut yong ki dorbar chnong.
Hawa klam hadien i yachem wa u Montri Rangbah, u General Secretary ka SNSBH, u RL Blah da ong u wa ka Synjuk da klam che ko wa ya kitu kiwa Test wa man Positive kiwa ym man wow sah ha yung toh u pynkit bait cha ki Corona Care Centre. Ha i jooh i por da ong wa ki dorbar chnong ym nood de ki wow wai ya ki Community Quarantine Centre hadien wa da khang noh nadooh u Naikhynde neibhah wa ya ki thaw wa da booh kyrpang neibynta kiwa liwan na baar ka jylla, wei ha i jooh i por neidaw i lutsan, wei ha ki 5 bnai wa da dep ym jooh em i yarap na ka sorkar, wei lada emkaam wow pteiñ ya kini ki thaw ha ki chnong, ka sorkar toh u e yarap poisa ko wow pynlai.
Da ong u wa ka Synjuk da kyntu ko leh ya ka sorkar wow booh sa artylli ki thaw thang ya kiwa khlaad na ka khlam COVID- 19, neibhah ki chnong ym em loom tlep-bru ki, wei lada em i ku kiwa khlaad, ka sorkar ym toh u pynkit beiñ ko ha ki dkhot wakreh mon sñiawbha ha ki chnong, tangwa ka sorkar toh u sikai ko ya ki khynroo khyllood ka chnong kammon wow leh manda em kiwa khlaad na ka khlam deiwa su leh ya ki, wei u man ko leh ka laad yoh kaam. Chooh chooh da pyntip u wa da e yumut leh ya ka sorkar wow thied næ pynkhreh chwa ya ki thaw wow tlep ya kiwa khlaad na ka khlam.
U Blah da pyntip u wa u Montri Rangbah, u Conrad K Sangma da kular u wow chimkhia ya ini i e yumut yong ka Synjuk wei wow pynche leh hajrong ka yurim wa ka sorkar da phah ko ya kiwa yoh COVID-19 cha yung hadien 10 sngi wa ki da chong ki ha ki Corona Care Centre.
