U Montri Rangbah ka jylla, u Conrad K Sangma da pyntip u wa da pynsñiaw biang u hakhmat u Montri ka sorkar India uwa pait yei puræ puthi, u Dharmendra Pradhan hajrong i wym yoh tulop kiwa sikai SSA hapoh ka jylla.
U Dharmendra Pradhan ynne ka sngi Bibar da wan poi u ha Shillong wow wai ya ka Central Institute of Hindi, Shillong Centre ha Mawdiangdiang. Hawa kylli na u Montri Rangbah hajrong i sahkut ka tulop yong kiwa sikai Samagra Shiksha Abhiyan (SSA) ha ka jylla kattu la 5 bnai, da pyntip u wa da yaklam ya kani ka phang wa u Montri heiwa da kular u wow chimkhia neibynta wow pynlait chooh ka poisa wow su cha kiwa sikai SSA.
U Montri Rangbah da pyntip u wa ini i eh wym yoh tulop kiwa sikai SSA toh ha waroh kawi ka ri India, tangwa ka jylla Meghalaya da yoh ko kajiak ka poisa neibynta wow su cha kiwa sikai. Da ong u wa katni ka sorkar ka dang pynkhreh biang ko yeiwa emkaam neibynta wow yoh chooh chooh ka poisa, heiwa da pynrap wa ka SSA toh ka Scheme yong ka sorkar India wei 90% i su toh wa wan na ka sorkar pyrdi wei ka sorkar jylla ym ye ko wow leh iyi iy lada ym yoh ya ka poisa na ka sorkar India.
