Jowai: Ka Meghalaya Bharat Scouts & Guides, West Jaiñtia Hills District kam chibynta wow pteiñ i pynman nae pyndep ya ki sarin wa da booh yong i leh burom dap 151 snem yow Mahtma Gandhi næ ka Gandhi Jayanti Week kawa da sdang ha ka 2 tarik u Naichiphaw.
Ynne won ka sngi da pynman ya ka yakob chna tiar næ Art & Craft Competition waka yakob thoh dak næ Calligraphy Competition neitæ won ha kini ki sngi wa dep, da pynman ya ka yakob dro dur næ Drawing/Painting Competition hajrong ka phang wa ong “ A Portrait on Mahatma Gandhi” waka Cleaning Drive nae i pynkhooid pynjngiar kawa man kawi na ki thong krehkaam yong u Mahatma Gandhi wow pynman ya ka ri India kam kawi na ki ri wa sap wakup yei dur wakhooid wajngiar.
Hei yaklam wa ki bor pynlai ka Meghalaya Bharat Scouts & Guides, West Jaiñtia Hills District da ong wa ki yakob waroh kiwa da pynman chi tayaw lynter toh kiwa da chna kyrpang heiyatoh wow Mahatma Gandhi, deiwa yooluti wa na kani ka prokram ki khynnah Scouts-Guides u yoh myntoi ki chiboon khamtam heiliang i tip chaphang yong oo kam uwi na ki bru wakhroo yong ka ri India kamjooh ha chityllup pyrthai.
Ya kani ka leh burom wa chitayaw lynter u pynkut ha ka 9 tarik yong uni hi u bnai deiwa em ka yalang watbian hei wow sam ya ki Prize cha kiwa jop yong ki yakob waphær wei pynkup burom ya ki dkhot ka Meghalaya Bharat Scouts & Guides, West Jaiñtia Hills District kiwa da yoh yei kyrdan Commissioner.
