Shillong: Ka Election neibynta ka Williamnagar Constituency kawa da boohteiñ neidaw i chah tynyap u kyrtong ka NCP, u Jonathane N Sangma daw pynman noh ya ka ha ka 27 tarik uni u bnai.
Hawa yaklam wa kiwa pathai khubor u MLA ka Gambegre uwa man leh u President ka NCP Meghalaya, u Saleng A Sangma da pyntip u wa ka Party da pyntikna ko wa ka kurim u Jonathane, ka Krenilla R Marak daw yakhun ko na ka Party katkam i kwah ki paidbah.
Da ong u wa ki paidbah ka Williamnagar kwah ki na pyrdi kiwa hayung u Jonathane wow yakhun ya ka Election wei ka Krenilla daw thap pyrtuid ko chwa ka 10 tarik. Da ong wa ha kani ka kynti neiliang ka sorkar da e ko ki bor sonteri wow yada bha ya ka kyrtong ka Party khnang wow lait na iwon iwon i jia wa sñiawsih.
Da ong u leh wa ka Krenilla toh kawa khlem pyndep ya ka Class X tangwa da yoh ko ya ki yumut na ki stat aiñ wei kiwa kreh ka Party kiwa da jooh emlang wa u kurim yong ka heijooh i por u Saleng da kubur u leh wa ka Vote wyr’ai na ki paidbah daw krehkaam ko ha kani ka Constituency.
Ha iwi i liang da ong u wa ka yakhun pyrchah yong ki kyrtong yong ki Party kiwa kyrchaan ya kani ka sorkar MDA ym em i yaphær neibhah ki kyrtong dadep pynkhreh ki neibynta ka Election wei ymye de u phah randien ya ki, heijooh i por da ong u wa ka NCP ym pynyieñ kyrtong ko na Ampati wei daw e ko i kyrchaan ya ka party NPP.
Ka Krenilla daw haap yakhun ko pyrchah ya ki 8 ngut ki kyrtong ha kani ka election wa kynthup ya u Marcuise N Marak (NPP), Deborah C. Marak (INC), Mahamsing M. Sangma (UDP), Sengbath R Marak (Independent), Lahatson N Marak (Independent), Santosh R. Marak (BJP), Siljong R. Marak (Independent) wa u Jan N. Arengh (Independent).
Discussion about this post