Ka KSU Lapangap Unit da lai yachem ko ya u DMHO ka West Jaiñtia Hills ynne hajrong ka yurim wow paan pynche wa lada ka Lapangap em pyrtuid ko hapoh ka thup ki 300 tylli ki Sub-Centre wa daw chna thymme ka sorkar iwa da pynbna da u Montri Rangbah ka jylla ha kini ki sngi wa dep.
Ka seiñ da dap ko dei sñiawkmen wow yoh yei jubab na u DMHO wa ya katai ka Sub-Centre wa da tyrwa nadooh u snem 2019 da em pyrtuid ko hapoh kani thup wei dang sah ha ka VHC wa ka dorbar chnong wow pynbait pynbiang yeiwa emkaam yow chna ya katai ka Sub-Centre.
Kamtæ ka seiñ da ong ko wa ini toh i kyrkhu ya ka chnong Lapangap wa ya ki para marjan chnong wa kynthup ya ka Pdieñtaloo, Shiabnai, Mookalingi, Tahpatpnar, langkaroi, Muchut wei hei yong sakhiat ya ka Lapangap da toh u yoh Sub-Centre nadooh ki por wa nachwa yow pynsuk khamtam ya ki kynthai wa punkhon deiwa yoh ya ka Sub-Centre.
Ka seiñ da ong ko leh wa i wym em Sub-Centre da ktah bha ko ya kiwa punkhon wei da em leh kiwa khlaad du heipor wa lai booh cha ka Khanduli Sub-Centre najrong wa jngai wei sih leh u sarok.
Ka seiñ hajrong ini ym chong klikti wei daw booddien hadooh yow yoh u khait yow soh wa jop.
Puræ leh: Daw chna 300 tylli ki Sub-Centre wa thymme: Conrad
