Ka Super Division Football League Tournament 2022 wa pynman da ka West Jaiñtia District Sports Association (WJDSA) kawa tip leh kam ka U Kiang Nangbah Memorial Trophy dapoi ko cha ka sngi wa ynniaw ynne.
Ka yalehke wa da pynman ynne ka sngi toh hapyrdi ka 7Wasa waka Lumiawmuchai Shangpung wa da jop da ka 7Wasa da 2-1.
Ka Lumiawmuchai da yoh ko wow thap nyngkong ha ka minit wa 5 lyngba u Sunidahoi Sungoh tangwa hadien ar minit da jubab ka 7Wasa da ka kool u Sucrip Manar ha ka minit wa 7 heiwa ka kylla step da kut ko khlem em de wa thap kool.
Ka yalehke da yoodur u kut ko khlem em wa jop tangwa chwa u kut i por itæ ha ka minit wa 90+3, ka 7Wasa da yoh ko wow thap chi kool lyngba u Samehi Ryngkli.
Mynstep ka 25 tarik ka yalehke u pynman hapyrdi ka Ladthadlaboh waka Khimusniang heipor 3:00 waje i sngi.
