Ha iwi i Video wa dang mih heiyatoh wa iwa jia ya u Raja Raghuvanshi da yoo ya u chan ka Sonam, u Raj Singh Kushwaha wa pyntngen u ya u pa ko heipor wa wanrah yei metyap u Raja cha yung ha Indore, Madhya Pradesh.
U Raja Raghuvanshi da chah tynyap u ha ka 23 tarik u Naisan wei da chem yei metyap yong oo ha ka 2 tarik uni u bnai.
Heiyatoh wa ini, ynnin ki pulit da kem noh ki ya ka Sonam wa ki soo ngut kiwa emkti wow tynyap ya oo na Madhya Pradesh wa na Uttar Pradesh wei kiwa chah kem kynthup ki ya u Raj Singh Kushwaha uwa man u chan ka Sonam, u Akash Rajput, u Vishal Singh Chauhan wa u Anand Kurmi.
Ka diah u Raja kawa man leh ka Social Media Influencer, ka Shrasti da booh Video ko langær ha Instagram heiyatoh wa ini i jia waroh nadooh wa wiar u Raja wa ka Sonam wei khamtam hadien wa chah kem ka Sonam.
Ha iwi i Video wa da booh ko da yoo ya u Raj wa u pa ka Sonam, u Devi Singh ha yung u Raja heipor wa wanrah yei metyap u heiwa da thoh ko wa “Da yoo ya u Raj Kushwaha wa u pa ka Sonam ha yung u Raja”.
Ha ini i Video da yoo ya u Raj wa pyntngen wei chdooh u ya u Devi Singh wei ka Shrasti da ong ko wa da yoo ya u Raj heipor wa wanrah ya i metyap u Raja na Meghalaya wa u pa ka Sonam heiwa da kylli ko leh wa lada u pa ka Sonam ong u wa ymtip u ya u Raj Kushwaha tæ uyi won oo uni u bru.
Discussion about this post