Ka USA da pynuiñ (Deport) ko 3,258 ngut ki nong India ha uni u snem hadooh 28 tarik u November, iwa heh dooh ha ki 16 snem wei ini man i kam ka thong u Donald Trump wow beh ya ki baar ri.
Neiliang ka sorkar India da pyntikna chwa ko yei tre kini ki bru chwa wow chimkti ya ki na ki lieñsuiñ wa kit ya ki na USA.
Yeini da khana da u Minister of External Affairs ka ri, u S Jaishankar hapoh ka Rajya Sabha ha kani ka tayaaw.
Kini kiwa chah pynuiñ toh kiwa psiah tooh cha USA, kiwa sah palat wa da kut ka Visa, ki wym em ki kot ki sla, kiwa tyngkheiñ aiñ wa kiwi wei ya kini da phah ka USA wow liwan da ki lieñsuiñ wa pynbiang hi ko.
Da pyntip u leh wa em kiwa chah kdoh ki kti wa ki kjat heipor wa em ki hapoh kini ki lieñsuiñ katkam ka Restraining Policy ka US wei yeini ym em leh ya ki khynnah wa ki kynthai tangwa iwa khaddooh ka rai da chim da kiwa pynlai ya ka lieñsuiñ deiwa pyrkhat yei chngaaiñ i lai i wan.
Chooh chooh da ong u wa ki bru kiwa da thooh ka India kiwa da tyngkheiñ aiñ da yoh biang u kem ki ha kini ki lieñsuiñ wa phah liwan ka USA heiwa kini kynthup ki ya u Lakhwinder Singh wa u Anmol Bishnoi.
Ha u 2024 da chah pynuiñ hadooh 1,368 ngut wei ini i ku ha u 2025 toh nadooh wa rai u Trump wow pynliwan ya ki wym toh ki tre ri ka USA wei i kynaad hapyrdi ka India wa ka USA hajrong i thied phñiang na Russia.
Deiwa kheiñ won nadooh u snem 2009 hadooh u November 2025, waroh dapoi 18,822 ngut ki nong India kiwa da chah phah liwan ka USA.
Discussion about this post