Jowai: Ka yung krehkaam yong ka District Disaster Management Authority (DDMA), West Jaiñta Hills District, ynne ka 1 tarik u da pynman ko yaka District Level School Mock Drill Exercise ha Che’s Star Secondary School Chutwakhu.
Ya kani ka e sikai næ ka Mock Drill Exercise da pynman ha kani ka skur toh chibynta u pynsñiawthooh yaki wa sikai ki khynnah skur kammon u leh lada jia i wan i bor pynjæd tympra ka rymaw ha skur heiwon iwon ipor khamtam hei khih khmi.
Da wan wow e i sikai da ki bru napoh Home Guard & Civil Defence, naka Fire & Emergency Service, naka tnat Health Department wa kiwi.
Ha kani ka sngi da pynsñiwthooh ki wa kammon u leh deiwa e laad ya ki khynnah u chim bynta kam hei wow e yarap ya kiwi tawon ki para khynnah skur wa chah ktah.
Nyngkong da pynkieh yaka siren kam ka dak wada khih u khmi neitæ ki khynnah da mih ki chalait, wei kiwa sikai da khut attendance ki, manda chem ki wa dang duna khynnah da psiah ki cha kamra class yow e yarap ya kiwa chah ktah wei da rah hei thaw e yarap First Aid Cell, hadien ini won da pynkit ya kiwa mynsoo daka Ambulance cha Chutwakhu Urban Health Centre yow yoh ki i sumaar na ki nurse wa ki doctor.
Hadien ka Mock Drill u N. Lamare naka Fire & Emergency Service da e u leh i batai bniah hei yatoh wa kammon u tymplæh diñ lada jia wa em i kopdiñ heipor wa jia.
Neitæ da em haroh i yalang tbian wow e i pynche chaki khynnah yow man ki kiwa pynkhreh lada jia wan i bor pynjæd tympra ka rymaw wada pyllai da u Ebormi Langshiang, DDMO West Jaiñtia.
Discussion about this post