Ka leh niam ya ka chaad Behdieñkhlam ka Seiñ Raij Mukhla da poi ko cha ka sngi kawa le ynne wei ya kani ka leh niam daw pynkut mynstep ka 20 tarik ha ka Aitnar ka Seiñ Raij Mukhla ha Mukhla Nongrim ha i por 2:00 waje i sngi.
Ynne ka 19 tarik ka sngi Musiang, ki khon khynroo khyllood chynrang wa kynthai ka Seiñ Raij Mukhla da wan rah ki ya u dieñkhlam na ka chnong Mukhla Umlangshor kawa man kiwa chong bri, wei ya uni u dieñkhlam da booh ya oo ha madan slot Masi, wei manda poi ha Madan Slot Masi, ki khon khynroo wa ki rangbah ka Seiñ Raij Mukhla hapoh i yahkhmat u Pa Langdoh wa ki waheh Sankur da lai ki cha Madan Tih Khyndaw wow lai pynyieñ nyngkong ya u dieñkhlam uwa man leh u Khnong Blai, wei hadien wa pynyieñ sa ya u Dieñkhlam ka Mukhla Nongrim ha Madan Slot Masi da bood won sa u Dieñkhlam uwa wanrah na ka chnong Mukhla Umlangshor.
Kamtæ kamwa da jooh leh chisien chi snem wa hadien wa da dep wow pynyieñ ya kini ki 3 tylli ki Dieñkhlam, da pynman biang ya ka Dorbar Niam wei da pynlai ya ka da u Pa Langdoh ryngkat wa ki Waheh Sankur wow yaklam pynbait ya ki kaam ki jaam neibynta ka Behdiñkhlam ha ka sngi Muchai kawa man leh ka sngi pynkut ya kani ka leh niam Behdieñkhlam.
Ya kani ka leh niam ya ka Behdieñkhlam da pynman ya ka katkam ki kyndon yong ka sorkar jylla lyngba ka chnat i chait i khiah deiwa bood ryntih leh ya ki SOP ka sorkar jylla.
Ha kani ka sngi ki khon khynroo khyllood ka Seiñ Raij Mukhla kiwa da mih deilang wa ki riam tynre toh du ya kitu kiwa ka Seiñ Raij Mukhla wa da dep wow jied kyrpang ya ki wow yoh u ya chimbynta.
Ini man ko katkam i pynlait khubor u Standbyme Sari uwa man leh uwi na ki Waheh Sankur na ka Kur Sari.
