Ka Meghalaya Bharat Scouts & Guides, West Jaiñtia Hills District kam chibynta wow pynyoo yei pliah ki khynnah Scouts-Guides ha ki rukom waphær waphær, ynne ka sngi da pynman ki ya ka Rajya Puraskar Testing Camp ha District Headquarter, Jowai.
Kani ka Testing Camp da man ko kawi na ki rukom wow leh næ pyndep man la u snem da ki bor pynlai ka Scouts-Guides Movement wa em ha kylleiñ ki jylla ka ri wei lyngba kam kini ki Testing Camp ki bor pynlai da ye ki wow tip ya iyi wa pliah ki khynnah neibynta wow pynkup ha ki ya ki kyrdan kiwa tip kam Ka Rajya Puraskar Award næ Governor Award wa Rashtrapati Award næ ka President Award.
Ha kani ka Testing Camp uni u snem da em kamwa 14 ngut ki khynnah wa kynthup 5 ngut ki Scout wa 9 ngut ki Guides na ki ar tylli ki skur wa kynthup ya ka Church of God Secondary School, Ummulong wa ka Marian Hills Higher Secondary School, Jowai wei ya kani ka Camp da chimkti wow pait u pynlai da ki bru ka Meghalaya Bharat Scouts & Guides, State Headquarter Shillong kiwa kynthup ya u Benharmaryo Myrthong, State Organising Commissioner Scouts, u Khrawkupar Iawphniaw, Staff State Headquarter Shillong, ka Catherine Nongkseh, State Organisng Commissioner Guides wa ka Matilda Lyngdoh, Assistant State Training Commissioner Guides ryngkat ka Siami Shylla, District Organiser Guides, u Elvis Dkhar, District Organiser Scouts, u Ohiwot Laloo, District Secretary MBS&G West Jaiñtia Hills, u Teiborlang Rymbai, Scouts Master, ka Niwan Khynriam, Guide Captain Church of God Secondary School, Ummulong wa ka Grecarisa Sana, Guide Captain, Lissi Pearl Secondary School, Mukhla.
Ki bynta wa ki rukom kiwa da pynman ha kani ka Rajya Puraskar Testing Camp toh ha ki rukom Knoting & Lashing, First Aid, Compass, Estimation wa kiwi kiwi kiwa yatoh wa i rukom im ki khynnah Scouts-Guides.
