Ka Department of Telecommunications (DoT), North East Licence Service Area (LSA), Shillong ynne ka sngi da pynman ko yei phet wa da e pyrtuid 5KM Shillong City Run kam chibynta ka Vigilance Awareness Week-2021.
Ya ini i phet da yahkhmat da ka Rephica Becky Pde, kawa pawnaam kam kawa phet Ultra-Marathon kawa na Shillong heiwa da em kamwa 50 ngut ki bru kiwa da chimbynta lang wa kynthup ya ki sahep ka Department of Telecommunications.
Ya ini i phet da sdang heipor 06:00 waje i step nadooh i yung krehkaam ka CTO Building wa em hajan i yung u Lat ka jylla wei da pynkut heipor 06:45 i step heijooh i thaw deiwa lai lyngba na Phan Nonglait Park, Malki Point, Don Bosco Square wa Gold’s Gym.
Ha kani ka sngi da emlang u Ajay Kumar Sahu, Sr. Deputy Director General; u KVK Prasad Rao, Deputy Director General (Administration), u Ashok Kumar Jain, Deputy Director General (Compliance); u Dilip Kumar, Deputy Director General (Rural); u Rajesh Kumar Maheshwari, Deputy Director General (Security) wa kiwi de ki sahep ka DoT North-East, LSA deilang wa u K. S. Madanpuri, Chief General Manager BSNL.
Kani ka Vigilance Awareness Week toh kawa da pynman nadooh ynne ka 26 tarik hadooh 1 tarik u Khonchonglad (Nov) heiwa ha uni u snem ka phang toh “Independent India @75: Self Reliance with Integrity”.
Ynne ka jooh ka sngi, neiliang ka Meghalaya Chief Secretary, ka R. V. Suchiang da yahkhmat ko yei smai kam chibynta kani hi ka Vigilance Awareness Week iwa da pynman ha pchem ka Main Secretariat (Rilang Building), Shillong deiwa emlang ki sahep sorkar.
Ka Vigilance Awareness Week toh kawa da leh man-u-snem yow man kam kiwa pait bniah ya ki kaam baam-tooh wei yow pynsñiawthooh ya waroh kammon wow yait na kini ki kaam baam-tooh wei kammon ktah ki ya waroh kamjooh ya ka imlang sahlang.
Ya ini hapoh ka ri da yahkhmat da ka Central Vigilance Commission kawa da chna hapoh ka aiñ Central Vigilance Commission Act, 2003.