Pynyoo ki khynnah yei sap wow pynlai ya ka Lympung wa kyrpang yong ki ha Tuber Shohshrieh

Ka Lympung ki Khynnah Seng Khasi Seiñ Raij kawa 21 wa da pynman ha chnong Tuber Shohshrieh, East Jaiñtia Hills District ynne ka sngi da man ko kawa phooh wa phieñ wei yoosuk chongkun u pait yei sap ki khynnah kiwa da chimbynta nadooh wow pynlai ya ka yalang yong ka Lympung, wow e i klam i khana, i chaad i rwai, i lehke Drama wa kiwi.

Ha kani ka Lympung wa kyrpang ki khynnah, da wan sakhi wan e mynsien ya ki da u Montri sorkar, u Wailadmiki Shylla, u Kyrmen Shylla, MLA Khliehriat, u Dy. CEM ka JHADC, u Lasky Rymbai najrong kiwi de, katwa ka Delina Khongdup, Member National Commission for Women da man ko kam ka kongsan.

U Dolloi ka Elaka Jowai uwa man leh u President ka lympung ki Khynnah Seng Khasi Seiñ Raij ong u, i sdang ya ka lympung ki khynnah toh hajrong ka yurim u pynsñiawbha u wailaad wailuti yow yoh lehkmen ki deiwa pynman lehkmen man-u-snem ha u bnai December wei pynkut won ha kam kani ka Lympung.

Wei kani toh ka rynsan wa kongsan ya ki khynnah u yoh ki yei sikai wa yaar, kammon u im tipbru tipblai, u kamai yei hok, u im tipkur tipkha najrong wow maya u burom yeiwa da yoh.

Heijooh i por kyntu u ya ki manbei manpa wow e por ki ya ki khon ki kti u lai ki cha ki chlem e sikai tynre neibynta i bha yong ki hi.

Ka kongsan hawa klam da yaroh ko yei sap pliah ki khynnah wow pynlai ya kani ka lympung, kamjooh leh ki bynta waphær waphær wa da chim ki ha kani ka sngi, deiwa ong leh wa man kiwa embhah wow yoh kam kani ka rynsan.

Ha kani ka sngi da kyntu haroh ko ya u Wailadmiki Shylla kam u Montri wa pait ya ki khynroo wow pyrchang thooh laad pynman u ka yalang wa kyrpang waheh yong ki khynroo hei yow pynyoo ki yei tynre nadooh i riam i chaad wa kiwi.

Kamwa man ko ka dkhot yong ka National Commission for Women khana ko leh wa kreh wei pait kyrpang ko neibynta i bha i miat ki kynthai ki manbei kiwa da palat 18 snem lada chah lehbeiñ chah yoohbeiñ i hok ki.

Hawa e mynsien ko ya ki khynnah ki khynroo kammon u im ki deiwa bha wei poi cha ki kyrdan wa hakhlieh, da khana ko yei parom i im yong ka wa kammon poi ko hadooh kani ka kyrdan, hanla toh ka bru wa wan naka manyung wa dooh wei kawa na ka chnong wa kyndong.

Ha kani ka sngi najrong wa yoh ki kyntien sneiñ kyntu, i rwai i chaad, i lehke Drama wa da chimbynta du da ki khynnah, da em leh i saam  khusnaam cha kiwa jop ha ki yakob waphær waphær wa da pynman nadooh u bnai wa dep.