Ka Department of Textiles, Meghalaya da lehkmen ko ya ka 8th National Handloom Day ha Umden-Diwon Eri Silk Village ynnin ka 6 tarik. Wei ha kani ka sngi da wai leh ya ka Design, Innovation & Resource Centre (DIRC) ha Umden-Diwon, Raid Nongtluh, Ri-Bhoi District.
Ya kani ka DIRC da sdang deiwa em 4 tylli ki bynta (i) Ahimsa Silk (ii) Organic Dyes (iii) Women Centric (iv) Global Presence Aspects.
U kongsan uwa man leh kam u Minister of Textiles, u B. Lyngdoh, hawa wai ya kani ka DIRC da yaroh u ya ka Textiles Department kawa da wai ya kani ka thaw yow thain that kamjooh wow pynyoo rong ya ki riam tynre wa da pynwandur da kiwa thain that ka jylla hi.
Kamtæ da yooluti u wa kani ka thaw u man ko kam ka thaw wow pynlang ya kiwa boon ki that thain kiwa daw booh ha kani ka Eri Silk Village.
Kiwi de kiwa klam ha kani ka sngi toh u MLA ka thaaiñ u M. Syiem uwa da e khublei leh ya ka chnat wa da wanrah ko ya kani ka DIRC deiwa kyrmen wa daw yarap ko ya kiwa chna riam kamjooh kiwa thooh bniah wow pynmait ya kini ki that nadooh i rukom thain, i chalan yow yoh myntoi waroh kiwa emkti lang heini.
U DC, Ri-Bhoi da pyntip u wa da ya krehlang wa ka NIFT yow pyntikna wa ki that wa pynmih toh kiwa miat wei kiwa phær bha kiwa yoh du na kani ka thaw donhi.
U F.R. Kharkongor, Commissioner & Secretary, Textiles hawa e yei klam phang pyrdi da ong u wa ka DIRC toh kam ka nongmuna wow pynyoo kammon wow ye u pynlai yaw ya ki mar na ini i chnong wa khian cha ka pyrthai yow pynpawnaam yei pyrtuid u Ryndia deiwa e pyrtuid ya kani ka thong “From Thread to Trend” deilang wa i kyntien imsngi “Rooted in Nature, Connected to Culture”.
Ha kani ka sngi da pynkupburom leh ya ka kiwa thain that ka Kiniho, Zong I Hi, Nangcwa, Ri Last, Sailum wa Eri Weaves yei bynta yong ki wow pynchlur wei wow e mynsien u thain that.
