Jowai: Ka seiñ JYF waka HANM da pynsñiaw ki yei pyrchah joor yei pynkhamti biang ya u Madon Bai Rymbai kam u CEM ka Jaiñtia Hills Autonomous Distric Council (JHADC), hajrong ka yurim wa uni u jooh u bru da jooh ksoh u kam u CEM ha u snem 2013-2014 wei da mih kawa boon ka kynrum kynram ha kitæ ki snem.
Ki seiñ da ong ki wa uni u bru heipor wa lai yachem ki seiñbhalang ha kamra yong oo neibynta ki kaam paidbah da klam u da ki ktien khlem akor kawa ym sñiaw yahaap de wow man u kam uwa mihkhmat ya ki paidbah.
Ki seiñ da pynkynmoo ki wa da em ki kaam wa baamtooh u ya ka poisa paidbah kawa da poi hadooh chi klur khadphra lak tam kawa toh ka poisa ka Council wei ha kani ka por da mih i kynrum kynram kawa chyrkhei hapoh ka ri-loom Jaiñtia waroh kawi wei kani ka kaam da poi ko chadooh ka yung bichaar wow tuklar ya kani ka kaam, tangwa hadooh katni ki paidbah yong ka jylla ym pu che ki hei yatoh wa ini baamtooh hapoh ka JHADC.
Kamtæ hajrong kani ka yurim, neiliang ki ar seiñ hapoh i yahkhmat u Damon Dkhar Secretary HANM Central Body wa u Wanbun Dkhar Vice President JYF CB, da pynsñiaw ki yei pyrchah joor wow chimkti biang u ya ka kaam CEM hapoh ka JHADC wei ki seiñ daw pynman ki ya ki yakhih paidbah kawa joor wow pyrchah ya uni u bru uwa da man chwa u moochynthut ya ka roi ka paar ha ka imlang sahlang ka jaitbru.
Kini ki ar seiñ da pynkut ki ya ka khubor deiwa ong wa lada em ki bor kiwa na baar kiwa kwah wow pynku ya uni u bru ha ka khet CEM ymtoh u kheiñ ki ya ka ri-loom Jaiñtia kam ka thaw noh jhep.
Discussion about this post