Jowai: Ki ar tylli ki seiñbhalang wa khynthup ya ka JSU wa ka HANM da pynsñiaw ki yei pyrchah wa joor yei thmu u montri rangbah ka jylla, u Conrad Sangma wow e Work Permit ya kiwa na ka ri Bangladesh.
Kini ki ar seiñ da ong ki wa u Conrad da tyrwa u ya ka sorkar pyrdi wow e Work Permit ya kiwa na ka ri Bangladesh kiwa kwah u khih mylla cha kani ka ri iwa daw booh hei ma ya kiwa boon khamtam ya ka jaitbru kawa khian paaid neibhah wa wot hadooh katni chong syir mynsien ki paidbah.
Da sñiaw phylla ki leh wa u montri rangbah u em u kam ini i thmu heiwa ki seiñbhalang neipor cheipor da dawa ki na ka sorkar wow em ki aiñ wow sonteri yei psiah i mih ki chapoh kani ka jylla.
Da ong kini ki ar seiñ wa i psiah kini ki baar jylla daw ktah ko chiboon yei yoh khih yoh kreh ki tre jylla neibhah wa ki bru kiwa na Bangladesh jooh sñiawsuk bha ki wow wan ku cha ki ri loom khamtam heipor lyiur wei iwa hadien poi chei sah dooh ki cha kani ka jylla.
Hajrong ini waroh kini ki ar seiñbhalang kiwa kreh neibynta i bha i miat ka imlang sahlang pyrchah joor ki ya i thmu yong u montri rangbah.
Ini toh katkam wa phah da u D. Dkhar General Secretary ka HANM.
Discussion about this post