15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Pyrchah joor kiwa thung yingkieñ jri wa ki tre thaw yei thung stat ka sorkar

0 Comments

Shillong: Ki tre thaw wa kiwa sumaar kiwa thung ya ki yingkieñ jri da beiñ joor wei da pyrchah ki yei lyndet ka sorkar jylla kawa ym em khut wei tipmit ya ki hei thmu yong ka wow pynman ya ki kam ki Heritage Site. Ini i pyrchah yong ki toh neidaw wa ka sorkar da wanrah hi-eh ko da kitæ ki stat thung dieñjri namo ki Consultant Expert kiwa na baar tangwa ki wym tip wei ki wym jooh em bynta heiwon iwon ha kani ka kaam wa da leh da ki warim wajah da ki spah wa hajar snem nachwa wa da hiar pateiñ ha kani ka pateiñ wow pynneh pynsah wei wow sumaar ya kini ki yingkieñ jri.

Hawa yaklam wa kiwa pathai khubor ynne ka sngi ha Shillong Press Club, u Chairman ka Living Root Bridges Foundation, u Morningstar Khongthaw, da kam u wa ka sorkar da leh stat ko ya kani ka kaam deiwa wanrah ya kitæ ki Consultant næ ki stat wow wan sikai wei batai ya i kaam thung ya kini ki yingkieñ jri ki wym tip ware yeini neibhah wa kani ka kaam toh kawa da hiar pateiñ na ki warim wajah ha kani ka Ri-Loom Khasi Jaiñtia khamtam cha ki them Ri-War.

U Morningstar da ong u wa ka Living Root Bridges Foundation ym pyrchah ko yeini i thmu wow pynman ya ki kam ki Heritage Site tangwa pyrchah ki ya ka luti wa da lai wow leh yeini khlem em iwon iwon i kynjoh ktien wei khlem khut ya ki tre bri, kiwa sumaar ya kini ki dieñ jri. Da ong u wa ka sorkar da phah soi ko ya ka soskular khlem sñiawthooh wei ini da pynphylla ko ya ki waroh.

Da ong u wa u Chief Secretary ka sorkar jylla ha ka 25 tarik u Duyatra 2018, da khut u ya kitæ ki stat thung dieñ jri wa ki chnong tangwa iwa phylla toh wa ki tre bri wa kiwa sumaar wa sakhiat ymtip ki iyi iyi leh.

Ki yingkieñ jri da em ki da ki spah snem wa ki bru ka thaaiñ Ri-War dang pynneh wei sumaar ki ya ki hadooh kini ki sngi khlem em wa sikai namo kiwa batai.

Hajrong ini da dawa ki na ka sorkar wow e yutip bniah ko hajrong kitæ ki stat thung dieñ jri kiwa da wan lyngba ka Meghalaya Basin Development Authority (MBDA), kiwa ym tip sakhiat iyi iyi hajrong kani ka kaam.

Kattu katni ki bru waheh kiwa sumaar wei ri ya ki yingkieñ jri kam u Jobenstone Nongkrod na Pynter, u Damarseus Rani na Kongthong, u Hila War na Laitkynsew da ong ki wa i batai kitæ ki stat thung dieñ jri wa thung da ka sorkar ym yahaap i katkam i stat yong ki warim nachwa kiwa da thung ya kini ki dieñ jri da ki spah snem nachwa.

Da rai ki wa ymbien ki wow soi ya ka hukum ka sorkar wa da phah cha ki chnong neibhah wa ini pynyoo i wa ka sorkar da lai lait ko ya ki tre wei da burom ko ya ki bru wa wan chim kabu donhi.

Previous
Next

0 Comments

Leave a Reply