Jowai: Ka East Jaiñtia National Council (EJNC)-Central Executive Council, da pynsñiaw ko yei sñiaw khyrngiat kawa khroo wa em i thmu wow seiñ yaka karkhana Coke Plant (kawa thang ya u mooyong) haka chnong Jalaphet, Bri Sutnga, East Jaintia Hills District.
Katkam ka khubor wa da mih, neiliang u waheh chnong yong ka Jalaphet u Womly Chyrmang da dep e NOC wow booh ya katai ka karkhana wei neiliang yong ka Executive Committee yong ka Dorbar Chnong, Jalaphet da pyrchah joor ki ya i chna ya katai ka karkhana, neidaw wa ya ka NOC da e khlem yoh i mynjur yong ka EC wei ya i chna ya katai ka karkhana da pynsangeh chwa chipor.
Neiliang yong ka EJNC da pynsñiaw ko yei pyrchah kawa joor hajrong i thmu wow chna ya katai ka karkhana haka chnong Jalaphet, deiwa ong wa i wan yong ki karkhana ym wanrah ko yei yohmyntoi yaka imlang sahlang, wei daw myntoi du ki kattu katni ngut kiwa em ha i bor wei daw pynsih, pynpra ko yaka bei rymaw da ong u Sambormi Lyngdoh, President Rangbah EJNC.
I em yong kam kini ki karkhana hapoh ka chnong ka thaw daw ktah joor ko ya ka chait ka khiah yong kiwa chong chnong wei daw booh ko hei ma kawa khroo ya ka pateiñ ka wow wan na i wan buhai chnong yong ki baar jylla lyngba kini ki karkhana, ka seiñ da kyntu ko ya ki paidbah wow yieñ skem wow pyrchah ya katai ka karkhana.
Ka seiñ ka dawa ko na ki bor pynlai yong ka EJHD lyngba u Deputy Commissioner wow phah sangeh chwa ya i chna ya katai ka karkhana deiwa dawa leh wow pynman chwa daka Public Hearing hawa thmu wow chna ya kiwon kiwon ki karkhana waphær waphær hapoh EJHD.
Kamtæ ka seiñ da ong ko wa lada i chna ya katai ka karkhana u dang pteiñ ko neini cha khmat khlem da pynman ya ka Public Hearing, neiliang yong ka seiñ ym banse ko wow leh ya kiwa emkaam.
Discussion about this post