Ka seiñ Jaiñtia Student’s Movement (JSM), Eastern Region hapoh i yahkhmat u President u Wellson R.D. Siangshai wa u General Secretary u S. Bareh deilang wa ki dkhot, ynne ka sngi ka 20 tarik da lai yachem ki ya u Deputy Commissioner, East Jaiñtia Hills District hadien wa ka seiñ da yoh ko ya ka ujor na kiwa ri sniang (Supplier) na ka District wa em ki kattu katni ki Supplier ki wym toh ki tre jylla kiwa wanrah ya u ki sniang symbe (Piglets) na ka jylla Assam cha ka District du wow myntoi samen khlem da pyrkhat ya ki bru yong i.
Ka seiñ da ong ko wa ini i leh yong kini da booh ko hei maa hadooh kattæ kattæ ya ki sniang yong i khamtam hahajrong wa poor sa ka khlam sniang wa tip kam African Swine Fever.
Chooh chooh kam ha ini i por yong ka khlam COVID-19 da booh ko hei eh ya ki bru yong i wow pynlai yaw kamwa jooh ki waroh chi kattu kiwa da chaniah wow pyndap pynbiang ya iwa emkaam na i ri sniang. Kamtæ ka seiñ da e khublei ko ya u DC wa smat u wow paitbniah hajrong ini i eh yong kiwa ri sniang wa ki Supplier yong ka thaaiñ.
Ka seiñ da maham ko ya ki bru wa na baar wa pyrchang wow leh tre wei wow knieh ya i jakpoh yong ki bru yong i khlem da pyrkhat ya i eh yong ki du wow myntoi samen.
