Ka Jaiñtia Students’ Union- Jowai Circle da pyrchah joor ko yei pynman ya ka tamasa kawa tip kam ka Summer Jam Music Festival kawa da booh wow pynman ha ka 23 tarik uni u bnai hajan ka Jowai Civil Hospital, Ialong neibhah wa man ko pyrchah ya ka aiñ Noise Pollution (Regulation and Control) Rules, 2000 hapoh ka Environment Protection Act, 1986 wa kani ka tamasa daw booh ko hei maa yei chongsuk chong saaiñ yong ki paidbah kiwa lai phah sumaar, kiwa thooh dawai wa kiwa thiah kjut.
Ka seiñ da lai yachem ko leh wa ka Additional Deputy Commissioner yong ka West Jaiñtia Hills District, kawa da ong wym tip ko iyi iyi chapahng kani ka tamasa wei ymtip ko leh wa lada yoh bor ki wow pynman ka, wei ini da pynkhyrngiat ko ya ka seiñ kammon wa da leh yeini khlem da yoh bor.
Ka seiñ da ong ko wa kani ka thaw wow pynman ya kani ka tamasa toh kawa jan bha cha ka Hospital iwa daw pynthut ya kiwa wan cha phah sumaar wa kiwa em ha kani ka Hospital kamjooh leh yei lai i wan ki kari khamtam kiwa jhan.
Ka JSU Jowai Circle da pyrchah joor ko ya ka chnat Tourism kawa da kyrchaan wow pynman ya kani ka tamasa khlem da pyrkhat ya kiwa kjut wa chitom kiwa wan phah sumaar neibhah deiwa tem sur deiwa ood ha kani ka thaw kawa man kam ka Silent Zone man ko pyrchah ya ka aiñ.
Kamtæ da kyntu ya ki bor synchaar chnong, ki bor District deilang ka Meghalaya State Pollution Control Board wa kiwi de wow tuklar ki deiwa kyrriah ya kani ka tamasa cha kawi won ka thaw neibynta i bha i miat.
Discussion about this post