Jowai: Ka seiñ Jaiñtia Youth Federation (JYF) East Jaiñtia Hills katkam ka khubor wa pynlait u President u John Pala da ong u wa pyrchah ki yei rai yong ka sorkar Meghalaya wow chah yei wan u mooyong naka jylla Assam cha ka Meghalaya neidaw wym em sñiaw yahap wei wym em sñiaw biang ko yei rai ka sorkar.
Ka seiñ pynsñiaw ko i lyngngoh wa waroh chi kattu ka jylla Assam yoh mooyong ko na ka jylla Meghalaya, katwa manda poi kam ini i por won ka Meghalaya hap paan mooyong ko naka jylla Assam.
Da ong ko wa wym em sñiaw yahap yeini i rukom phah mooyong kamtæ ka seiñ da pynrem joor ko yei thmu ka sorkar jylla u wanrah ya u mooyong na Assam lyngba u M.R. Synrem (IAS) uwa man leh kam u Commissioner & Secretary ka chnat Commerce & Industries neibynta i thmu yong ki karkhana Cement Plant kiwa em hapoh ka East Jaiñtia wei i wow wanrah mooyong hadooh 30 truck naka jylla Assam.
Chooh chooh da ong wa ini toh du neidaw i yoh myntoi ki Company Cement Plant donhi khlem kheiñ de hanla ha pyrdi ka Lockdown neibynta u khanglaad yei poor u khniang COVID-19.
Da pynbaad wa i rai yong ka sorkar jylla lyngba ka chnat Commerce & Industries booh ko i eh i khoo ya ki paidbah wa chong chnong yong ka EJHD, wei kamjooh leh i maa wa khroo khamtam heini i por wa poor u khniang COVID-19 na kawi ka jylla cha kawi ka jylla lyngba i wan ki truck kit mooyong.
Kamtæ ka seiñ wa jooh pait yei bha i mait yong ka imlang sahlang da pyrchah joor ko yei pdiang ka sorkar jylla u wan ki truck mooyong na Assam khamtam kam ha kani ka por wa ka ri India waroh em ko hapyrdi ka Lockdown nei bynta u yada yaki paidbah nei poor u khniang COVID-19.
Discussion about this post