Jowai : Ka KSU JHD ynne ka sngi da li yachem ki, waka Secretary Executive Committee ka JHADC hei yatoh wa thung kaam sop sop ka EC ka JHADC ya u P.K. Deb kam u Accounts Officer da ka Contract Basis wa chi snem.
Ya u P.K. Deb da thung kreh ya oo nadooh ka 1 tarik u Wisu (March) 2016 hei su tulop wa T. 50,000 chi bnai wa kynthup deilang T. 10,000 kam ka bai lai bai wan u.
Ya kani ka poisa da sai naka District Fund. U P. K. Deb toh uwa da chongngiah wei jooh man u leh kam u Welfare Officer yong ka ophis Account General (Audit) Shillong.
Neiliang ka seiñ da kylli ko wa “ileh ym em mo ki tre ri wa ye u kreh ya ini i kaam, ym em ki bru yong i kiwa da chongngiah wow yoh yoh u kreh ha kam kani ka kreh?”.
Da ong chooh chooh ka seiñ wa heijooh i por uni u bru toh uwa yoh ya ka pension kamjooh ki allowance naka sorkar jylla. Da pteiñ leh deiwa ong wa thung kreh ya u P.K. Deb khlem em da e wyrta næ ka advertisement.
Ka KSU leh ynne ka sngi hei yachem ki, wa ka Secretary Executive Committee ka JHADC da booh ki leh wa ki kot ki sla hei yatoh wa pyrchah joor ka seiñ yeini i leh ka JHADC, wei da dawa leh wow pyndooh noh yei kreh u P.K. Deb
Neilaing ka Secretary da ong ko wada thung ya uni u bru neidaw wa ym em ki bru yong i wa ye u kreh yeini i kaam.
Neilaing ka seiñ da ong ki, wa kammon u tip wa ki bru yong i ym ye ki u kreh yeini i kaam heiwa tang ka Advertisement yeini kreh leh ym em e ka JHADC. Neiliang ka Secretary da kular ko wow pyntip cha ki EM heiyatoh wa ini i kaam.
Ha ka dorkhas wada booh ka KSU da ong ki wa toh u pyndooh kreh noh ya u P.K. Deb hapooh 5 sngi kamjooh u CEM toh u hiar chuki noh u lada ym ye u leh yeini.
Ka seiñ leh da maham ko wa lada ym ye ka JHADC u leh yei dawa, ka KSU daw sdang ki dei yakhih wa eh bha.
Ha kani ka sngi ya ka KSU da yahkhmat da u Albinus Lamurong Assistant General Secretary KSU Jaintia Hills District Unit.
Discussion about this post