Jowai: Ka Khasi Students’ Union War Jaiñtia Circle da pynrem joor ko yaka yung krehkaam ka Child Development Project Officer, Amlarem hajrong wa pyndam kreh yaka Mercy Lamin Amdep na Nongbareh Rim kawa kreh kam ka Helper (AWH) du neidaw wa ym em ko yaka Aadhaar Card.
Ka seiñ da dap ko dei sñiawphylla neidaw wa katkam i yoh yutip lyngba ki hukum yong ka Supreme Court wa ya u Aaadhaar ym ye u pynbor næ pynkrehkaam yabor hapoh ka jylla yong i. Wei ini da man ko ka chim kabu ya ka hok longbru manbru na ki daw wym em Aadhaar.
Ka seiñ da ong ko wa hajrong ini i bynta ym chong kli kti, wei daw mih chakhmat neibynta wow paan pynche hei yatoh wa i chah pyndam kaam yong ka Mercy Lamin Amdep, ha i jooh i por leh ka seiñ da kyntu ko ya ka Y. Najiar ka CDPO, Amlarem wa toh u pynche bha ya kani ka hukum wow pyndam kreh lada ym em Aadhaar wei neiwon da yoh ya ka wei ha kawon ka tarik da mih kani ka hukum, lym kamtæ ka seiñ neibynta i myntoi yong u paidbah ym salia ko wow mih chakhmat wow yieñ pyrchah ya kani ka hukum neidaw wa kani daw ktah ko chiboon khamtam ya kitu ki manyung kiwa dooh ki wym em kaam em jaam.
Ka seiñ da kyntu ko cha waroh kiwa chong chnong hapoh War Jaiñtia wa lada em kam kini ki jait jia wa ym toh u tien ki wei wow wan mih ki cha khmat wow ujor ya i eh wa chem deiwa yachem wa kiwa kitkaam ka KSU War Jaiñtia Circle.
Ini toh katkam wa pyntip da u General Secretary ka seiñ u Lurman B. Talang.
Discussion about this post