Ka Khasi Students’ Union (KSU) War Jaiñtia Circle ynne ka 2 tarik hapoh i yahkhmat u President u Laitphar Syngkrem, General Secretary u Lurman B. Talang, u Organising Secretary ka District u Leningrad Tariang wa u Finance Secretary u Kindly Khyriem da lai yachem ki ya u Deputy Commissioner, West Jaiñtia Hills District neibynta wow pyrchah yei thmu ka sorkar wow pynlait næ e laad ya kawi ka Company York Print Pvt. Ltd. wow challan yaki mar ki mata na Deoduar, Kamrup lyngba ka jylla Meghalaya yow pynpoi cha Bangladesh deiwa lai lyngba ka Tamabil Check Point, Dawki.
Ka seiñ hajrong ini da pynsñiaw ko yei pyrchah joor ha u Deputy Commissioner wa hajrong wa dang joor uni u khñiang khlam COVID-19 ha waroh kawi ka ri wei da khang pyrchah ya ki kari wow lai kulmar wei ka Assam hadooh katni dang em kiwa yoh ya uni u khñiang kjut, da booh ko hei maa lada wan ki bru kiwa rah ya uni u khñiang.
Ka seiñ da ong ko leh wa da yoo wa ha kini ki por wa dadep wot hapyrdi i khang laad ya ki bru wa na baar wow wan psiah chapoh ka jylla tangwa em hi kiwa dang wan hi neibhah wym biang ka District Administration wow paitbniah bha ya ki kari.
Ka seiñ da pynrem joor ko leh neibhah ka sorkar ym ye ko wow batai bha katkam ka chithi ki mar ki mata kitæ wow challan wei ileh ym man leh wow sangeh chwa kat wym pu khooid u bha uni u khñiang kjut.
Ka seiñ da kyntu ko yaka sorkar jylla wa toh u pynsangeh syndon ya kani ka kaam khnang wym em i thut haka imlang sahlang wei toh leh wow pyrkhat bha chwa wow pynmih kam kini ki hukum.
Ka kyrwoh na u General Secretary u Lurman B. Talang.
Discussion about this post