Pyrchah ka seiñ All India Bank Officers Confederation wa pynbor ka sorkar ya ki paidbah wow yaleh Aadhaar

Jowai: Ka seiñ All India Bank Officers Confederation kawa man ka seiñ yong ki sahep wa kreh bank kawa em kamwa 3,25,000 ngut ki dkhot da pynsñiaw ki yei pyrchah wa joor wa pynbor ka sorkar India wow yaleh Aadhaar ki paidbah hei thaw u man ko i hok ki paidbah wow jied namo wow kyntait ki paidbah ya u Aadhaar deiwa ong wa ini man i pyrchah ya ka riti synchaar ki ka ri.

Da ong ki wa katni ki Bank toh kiwa da khia kaam chwa wei duna ki bru wa kreh du neiwa sdang ka sorkar ya ka scheme Pradhan Mantri Jan Dhan Yojana heiwa ki bank da dep wai Bank Account ki 29.13 Klur tylli ya ki paidbah. Neibynta ka ram Mudra Loan palat 62.58 Lak tylli da pynkhreh wei da em leh sa ki Scheme sorkar kam ka Bhim, Jeevan Jyothi, Jyoti Bima, Suraksha Bima kiwa da pynemkaam boon i por kiwa kreh Bank khlem yoh nong ki.

Katni won da phah ya ki Bank wow booh sa ki thaw wa ye ki paidbah wow yaleh Aadhaar ki ha waroh ki tnat yong ki wei da phah kreh ya ki wakreh wot ha ki sngi chuti da ka sorkar khlem su pyntam ya ki.

Ka seiñ da ong ko wa ym sniaw yahaap ko ya ini neibhah ya u Aadhaar hi dang chong bichaar ka Supreme Court wei ymtoh u pynbor ya ki paidbah kamjooh ya ki Bank wow pynyabi ki ya u Aadhaar wa ki Bank Account yong ki.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Heiyatoh wa i bichaar ka Supreme Court ka seiñ da ong ko wa da dep pynmih hukum ko wa ya u Aadhaar ye u pynemkaam wow saam ya ki Scheme wow saam khoo ration, chini wa kiwi kiwi wei kamjooh leh heipor wa saam LPG Gas.

Tangwa ini ym em mut ko wow pyndooh yei hok ki paidbah wa ym em ya u Aadhaar.

Ki paidbah won boon kiwa da tieñ hadien wa pynmih hukum won ka sorkar katkam wa pynkylla ya ka Prevention of Money Laundering (Maintenance of Records) Rules 2015 ha uni u snem wa ong wa waroh ki Bank Account toh u pynyabi ki wa u Aadhaar chwa wow kut u snem lym kamtæ daw yap ki Bank Account ki.

Katwa ka Reserve Bank of India (RBI) won ym pu em u paan pynche ko na ka Supreme Court wa ye ko namo ym ye u leh ya ini iwa pynyoo waka sorkar wa ka RBI ym em yakrehlang ki wei ym em sniawthooh yumut ki.

Kamtæ ka seiñ All India Bank Officers Confederation da dawa ko na ka sorkar wow pyndam chwa wow pynbor ya ki paidbah wow yaleh Aadhaar ki kat wympu pynmih hukum wa khaddooh ka Supreme Court.