Jowai: Ka seiñ The Ultimate Legend Bikers Association (TULBA) da pyntip ko lyngba u President u Seiborlang L Nonglait wa ka seiñ da yoo ko yei maa wa khroo tam lada ka sorkar NDA pynkrehkaam ko yaka Citizenship Amendment Bill 2019, neidaw wa da ki phaw lak ki nong Bangladesh daw wan ki wow man kiwa chong chnong wa pura yong ka ri India, ha North East da yoo wa ka Tripura toh kawa em jrong dooh u pood waka Bangladesh uwa jrong hadooh 856 Km iwa da wanrah yei chah tyllep ki tre chnong ha ki nong Bangladesh, katwa ka Meghalaya ka wan wa ar ko haka kyrdan wa jrong wa em pood uwa 443 Km waka Bangladesh.
Kiwi won ki jylla kam ka Sikkim em ki ka aiñ kawa tip kam ka Restricted Area Permit and Protected Area Permit ka aiñ wa ya sariem wa ka aiñ ILP, ha Mizoram em ko yaka ILP, ka Article 371(g), ha Nagaland da em ka aiñ ILP deilang waka Article 371(a), ka sorkar Assam da pynkrehkaam ko yaka NRC, katwa du ka sorkar Meghalaya ym em ko i kitkhlieh ya ka pateiñ ka wa daw wan yong ka jaitbru, ka Sixth Schedule ym ye ko wow yada pura yaka jaitbru katwa dang em ka para 12(a) neidaw wa kiwon kiwon ki aiñ yong ka sorkar pyrdi ye ko wow pynyap ya kiwon kiwon ki aiñ yong ka District Council, kamtæ i da em chwa i ha i maa wow chah tyllep ha ki baar ri.
U President ka seiñ da ong u leh wa kiwa mihkhmat yong i ki dang boon kaam ki haka yaknieh chuki khlem pyrwa ya ka ri. I kheiñstin palat ka sorkar jylla MDA wow pynkrhekaam ya ka MRSSA Ordinance 2019, kamjooh wow booh yaki khyrdop Entry næ Exit Point hadooh ynne ym ye ki wow pyndep. Ini toh i wym hoi ka sorkar, hawa kuruiñ i cha u snem 2014, da maad yei wym chong suk chong saaiñ du na i daw wow dawa ILP iwa da neh soo bnai, i yakhih kam ka seiñ ym kwah ko wow yoo biang wa kthah yaka chong suk.
Kamtæ ka seiñ TULBA da mih ko chakhmat wow dawa ya ka aiñ wow yada ya ka jaitbru. Ka seiñ ka kyntu ko ya waroh ki paradoh parasnam kiwa mihkhmat ki seiñbhalang waphær waphær wa ki paidbah yong ka Bri u Ynñiawtrep Ynñiaw skum wow dawa pynkrehkaam ya ka ILP wow kyntait næ pyrchah ya ka CAB.
Discussion about this post