Khliehriat: Ka United Hynniewtrep Movement-Khliehriat Circle (UHM-KC) da pynsñiaw ko yei pyrchah hajrong i thmu wow pynman yaka pynsñiawpaidbah (Public Hearing) ka Meghalaya State Pollution Control Board wow pynheh ya i tih moochuni ka Star Cement ha chnong Brishyrnot, EJH.
Ka seiñ sñiawkhia ko yei sih dur biang ka wah Lukha, ka wah Lunar neibhah wa kani ka paar moochuni wa em ha Brishyrnot ym em de jngai ko na kini ki wah. Ka thaw wa thmu u tih moochuni ka Company da jan bha ko waka Narpuh Wildlife Sanctuary wei daw pynthut ya iwa im wa em haka.
Da ong leh wa kani ka thaw tih moochuni da jan bha ko cha ki thaw sah ki bru. Wei ini daw ktah ko chiboon yaka chait ka khiah yong kini ki bru wei heijooh i por kani ka Company ym toh kawa tip u burom yaka soskular wa da ya soi wow thung kreh ya ki tre chnong wei da wanrah pathan ko du ya i sih pynsih yaka rymaw.
Chooh chooh da ong wa ka seiñ ym em pyrchah ko yaka roi ka paar tangwa chem wa katai ka thaw tih moochuni em ko hadooh 42.051 Hectare i heh wei em ko hajan ka wah Lukha, wah Lunar wei syier wei ym tip de kayi wow jia yaka mynried ka rymaw yong i cha ka thaaiñ East Jaiñtia Hills District lada mankaam i thmu kani ka karkhana pynmih khyndaw-bilat.
Ya kani ka kyrwoh da pylliat da u General Secretary ka United Hynniewtrep Movement-Khliehriat Circle (UHM-KC) u Romeius Dkhar.
Discussion about this post